29, 30 & 31 Current Affairs ಪ್ರಚಲಿತ ವಿದ್ಯಮಾನಗಳು

 

ರಾಜ್ಯ ಸುದ್ದಿಗಳು :

------------------------------

________________________________________________________________________________

ರಾಷ್ಟ್ರೀಯ ಸುದ್ದಿಗಳು :

ಡಿಜಿಟಲ್ ಸಂಸ್ಥೆಗಳಿಗೆ ಡಿಜಿಟಲ್ ಭದ್ರತೆಯನ್ನು ಪರಿಶೀಲಿಸುವ ಉದ್ದೇಶದಿಂದ ವಿಚಾರಣೆಗೆ ಹಾಜರಾಗುವಂತೆ ಸಮನ್ಸ್ 

ಬಿಜೆಪಿ ಸಂಸದ ಡಾ. ನಿಶಿಕಾಂತ್ ದುಬೆ ನೇತೃತ್ವದ ಮಾಹಿತಿ ತಂತ್ರಜ್ಞಾನ ಸಂಸದೀಯ ಸ್ಥಾಯಿ ಸಮಿತಿಯು, ಇತ್ತೀಚಿನ NEET ಪ್ರಶ್ನೆಪತ್ರಿಕೆ ಸೋರಿಕೆ ಪ್ರತಿಭಟನೆಗಳ ವೇಳೆ ಸಾಮಾಜಿಕ ಜಾಲತಾಣಗಳು ಸಾರ್ವಜನಿಕರನ್ನು ಸಂಘಟಿಸಲು ಮತ್ತು ಸುಳ್ಳು ಮಾಹಿತಿ (Fake News) ಪಸರಿಸಲು ಬಳಕೆಯಾದ ಹಿನ್ನೆಲೆಯಲ್ಲಿ, ಸಾರ್ವಜನಿಕ ಶಾಂತಿ ಕಾಪಾಡುವುದು, ಬಳಕೆದಾರರ ದತ್ತಾಂಶ ಗೋಪ್ಯತೆ ಹಾಗೂ ಡಿಜಿಟಲ್ ಭದ್ರತೆಯನ್ನು ಪರಿಶೀಲಿಸುವ ಉದ್ದೇಶದಿಂದ ಮೆಟಾ, ಗೂಗಲ್, X ಮತ್ತು ಸ್ನ್ಯಾಪ್‌ಚಾಟ್ ಪ್ರತಿನಿಧಿಗಳಿಗೆ ಆಗಸ್ಟ್ 3, 2026 ರಂದು ವಿಚಾರಣೆಗೆ ಹಾಜರಾಗುವಂತೆ ಸಮನ್ಸ್ ನೀಡಿದೆ.

----------------------------------

16ನೇ ಜೂನಿಯರ್ ಪುರುಷರ ರಾಷ್ಟ್ರೀಯ ಹಾಕಿ ಚಾಂಪಿಯನ್‌ಷಿಪ್-2026

ತಮಿಳುನಾಡಿನ ಕೊಯಮತ್ತೂರಿನಲ್ಲಿ 2026ರ ಜುಲೈ 28ರಿಂದ ಆಗಸ್ಟ್ 8ರವರೆಗೆ ನಡೆಯಲಿರುವ 16ನೇ ಆವೃತ್ತಿಯ ಜೂನಿಯರ್ ಪುರುಷರ ರಾಷ್ಟ್ರೀಯ ಹಾಕಿ ಪಂದ್ಯಾವಳಿಯಲ್ಲಿ, ದೇಶದ ಪ್ರತಿಭಾನ್ವಿತ ಕ್ರೀಡಾಪಟುಗಳನ್ನು ಗುರುತಿಸಲು ಹಾಗೂ ರಾಷ್ಟ್ರೀಯ ತಂಡಕ್ಕೆ ಆಯ್ಕೆ ಮಾಡಲು ಎ, ಬಿ ಮತ್ತು ಸಿ ಎಂಬ ಮೂರು ವಿಭಾಗಗಳಲ್ಲಿ ಒಟ್ಟು 30 ವಿವಿಧ ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳ ತಂಡಗಳು ಭಾಗವಹಿಸಿ ಕಠಿಣ ಸವಾಲನ್ನು ಎದುರಿಸುತ್ತಿವೆ.

-----------------------------------

ಭಾರತ ನಾವಿಕರ ಪೂರೈಕೆಯಲ್ಲಿ ವಿಶ್ವಕ್ಕೇ 2ನೇ ಸ್ಥಾನ

ಬಿಮೋ-ಐಸಿಎಸ್ (BIMCO-ICS) ಇತ್ತೀಚೆಗೆ ಬಿಡುಗಡೆ ಮಾಡಿರುವ 'ಸೀಫೇರರ್ ವರ್ಕ್‌ಫೋರ್ಸ್ ರಿಪೋರ್ಟ್ 2026'ರ ಪ್ರಕಾರ, ಭಾರತವು ಜಾಗತಿಕ ಕಡಲ ರಂಗದಲ್ಲಿ ಅತ್ಯಂತ ಪ್ರಮುಖ ಮೈಲಿಗಲ್ಲು ಸಾಧಿಸಿದ್ದು, ಅಂತರರಾಷ್ಟ್ರೀಯ ಹಡಗುಗಳಲ್ಲಿ ಸೇವೆ ಸಲ್ಲಿಸುವ ನಾವಿಕರನ್ನು (Seafarers) ಪೂರೈಸುವ ವಿಶ್ವದ ದೇಶಗಳ ಪಟ್ಟಿಯಲ್ಲಿ 2ನೇ ಸ್ಥಾನಕ್ಕೇರಿದೆ. 2015 ರಲ್ಲಿ ಶೇ. 5.2 ರಷ್ಟು ಪಾಲುದಾರಿಕೆಯೊಂದಿಗೆ 5ನೇ ಸ್ಥಾನದಲ್ಲಿದ್ದ ಭಾರತ, ಕಳೆದ ಒಂದು ದಶಕದಲ್ಲಿ ಡಿಜಿಟಲೀಕರಣ, ಶಾಸನಬದ್ಧ ಸುಧಾರಣೆಗಳು ಹಾಗೂ ತರಬೇತಿಯ ಪರಿಣಾಮಕಾರಿ ವಿಸ್ತರಣೆಯ ಫಲವಾಗಿ ತನ್ನ ಪಾಲನ್ನು ಶೇ. 12.16 ಕ್ಕೆ (ಒಟ್ಟು 3,11,936 ಸಕ್ರಿಯ ನಾವಿಕರು) ಹೆಚ್ಚಿಸಿಕೊಂಡು ಅಗ್ರಪಂಕ್ತಿಯಲ್ಲಿ ನಿಂತಿದೆ. ಇದಲ್ಲದೆ, ಜಾಗತಿಕವಾಗಿ ಹಡಗು ಆಫೀಸರ್ ಭಾಗದಲ್ಲಿ ಶೇ. 13.41 ಹಾಗೂ ರೇಟಿಂಗ್ಸ್ ನಾವಿಕರ ವಿಭಾಗದಲ್ಲಿ ಶೇ. 11.29 ರಷ್ಟು ಕೊಡುಗೆ ನೀಡುತ್ತಿರುವ ಭಾರತವು, ಕೇಂದ್ರ ಸರ್ಕಾರದ 'ಮಿಷನ್ 20%' ಗುರಿಯೊಂದಿಗೆ ವಿಶ್ವದ ಕಡಲ ಪಡೆಗೆ ಅತಿ ದೊಡ್ಡ ಶಕ್ತಿಯಾಗಿ ಹೊರಹೊಮ್ಮುತ್ತಿದೆ.

ಕೇಂದ್ರ ಸರ್ಕಾರವು ಕಡಲ ವಲಯವನ್ನು ಸುಧಾರಣೆಗಾಗಿ ಜಾರಿಗೆ ತಂದ ಕಾಯ್ದೆಗಳು 

ಒಳನಾಡಿನ ನೌಕೆಗಳ ಕಾಯ್ದೆ, 2021 (Inland Vessels Act, 2021)

ಮರ್ಚೆಂಟ್ ಶಿಪಿಂಗ್ ಕಾಯ್ದೆ, 2025 (Merchant Shipping Act, 2025)

ಭಾರತೀಯ ಬಂದರುಗಳ ಕಾಯ್ದೆ, 2025 (Indian Ports Act, 2025)

ಕರಾವಳಿ ಹಡಗು ಕಾಯ್ದೆ, 2025 (Coastal Shipping Act, 2025)

ಜಾಗತಿಕ ನಾವಿಕರ ಪೂರೈಕೆ :

ಬಿಮೋ-ಐಸಿಎಸ್ (BIMCO-ICS) ಅವರ 'ಸೀಫೇರರ್ ವರ್ಕ್‌ಫೋರ್ಸ್ ರಿಪೋರ್ಟ್ 2026'ರ ಪ್ರಕಾರ, 

ಪ್ರಥಮ ಸ್ಥಾನ : ಫಿಲಿಪ್ಪೀನ್ಸ್ (Philippines)

ದ್ವಿತೀಯ ಸ್ಥಾನ : ಭಾರತ (India) – ಶೇ. 12.16 ರಷ್ಟು ಜಾಗತಿಕ ಪಾಲುದಾರಿಕೆ (ಒಟ್ಟು 3,11,936 ನಾವಿಕರು)

ತದನಂತರದ ಸ್ಥಾನಗಳು  ಚೀನಾ, ರಷ್ಯಾ ಮತ್ತು ಇಂಡೋನೇಷ್ಯಾ ದೇಶಗಳು.

-------------------------------------

ಆಗಸ್ಟ್ 2026ರ ಆರಂಭದಿಂದ ಜಾರಿಗೆ ಬಂದಿರುವ ಪ್ರಮುಖ ಐದು ಆರ್ಥಿಕ ಮತ್ತು ಆಡಳಿತಾತ್ಮಕ ನಿಯಮಗಳು:

ಪ್ರತಿ ತಿಂಗಳ ಮೊದಲ ದಿನದಿಂದ ಅನ್ವಯವಾಗುವಂತೆ ತೈಲ ಮಾರುಕಟ್ಟೆ ಕಂಪನಿಗಳಿಂದ ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್ ಬೆಲೆಗಳ ಪರಿಷ್ಕರಣೆ, ಬೋಟ್ಸ್ ಹಾಗೂ ಏಜೆಂಟ್‌ಗಳನ್ನು ನಿಯಂತ್ರಿಸಲು ರೈಲ್ವೆ ತತ್ಕಾಲ್ ಟಿಕೆಟ್ ಬುಕಿಂಗ್‌ನಲ್ಲಿ ಆಧಾರ್ ಮತ್ತು ಒಟಿಪಿ ದೃಢೀಕರಣ ಕಡ್ಡಾಯ, ಜುಲೈ 31ರ ಗಡುವು ಮುಗಿದು ಆಗಸ್ಟ್‌ನಿಂದ ಐಟಿಆರ್ ಸಲ್ಲಿಸುವವರಿಗೆ ರೂ. 5,000 ವರೆಗೆ ತಡವಾದ ಶುಲ್ಕ ವಿಧಿಸುವಿಕೆ, ಬ್ಯಾಂಕ್‌ಗಳ ಕ್ರೆಡಿಟ್ ಕಾರ್ಡ್ ಶುಲ್ಕಗಳ ಬದಲಾವಣೆ ಮತ್ತು ಭೌತಿಕ ದಾಖಲೆಗಳ ಅವಶ್ಯಕತೆ ಇಲ್ಲದ 'ಸೆಂಟ್ರಲ್ ಕೆವೈಸಿ 2.0' ವ್ಯವಸ್ಥೆಯು ನಾಗರಿಕರ ದೈನಂದಿನ ಆರ್ಥಿಕ ಹಾಗೂ ಪ್ರಮುಖ ವ್ಯವಹಾರಗಳ ಮೇಲೆ ನೇರ ಪರಿಣಾಮ ಬೀರಲಿದೆ.

-------------------------------------

ಪೇಟಿಎಮ್ ಬ್ಯಾಂಕ್ ವಿಸರ್ಜನೆಗೆ ಅಧಿಕೃತ ಲಿಕ್ವಿಡೇಟರ್ ನೇಮಕ

​ನಿಯಂತ್ರಕ ನಿಯಮಗಳು ಹಾಗೂ ಗ್ರಾಹಕ ಪರಿಶೀಲನಾ ವಿಧಾನಗಳ (KYC) ತೀವ್ರ ಲೋಪದೋಷಗಳ ಹಿನ್ನೆಲೆಯಲ್ಲಿ ಭಾರತೀಯ ರಿಸರ್ವ್ ಬ್ಯಾಂಕ್ (RBI) ದೆಹಲಿ ಹೈಕೋರ್ಟ್‌ನ ಅನುಮೋದನೆಯೊಂದಿಗೆ ಪೇಟಿಎಮ್ ಪೇಮೆಂಟ್ಸ್ ಬ್ಯಾಂಕ್ ಲಿಮಿಟೆಡ್ (PPBL) ವಿಸರ್ಜನೆಗೆ ಆದೇಶಿಸಿದ್ದು, ಈ ಕಾನೂನಾತ್ಮಕ ಪ್ರಕ್ರಿಯೆಯನ್ನು ಬ್ಯಾಂಕಿಂಗ್ ನಿಯಂತ್ರಣ ಕಾಯ್ದೆ, 1949 ಮತ್ತು ಕಂಪನಿಗಳ ಕಾಯ್ದೆ, 2013 ರ ಅಡಿಯಲ್ಲಿ ಪೂರ್ಣಗೊಳಿಸಲು ಮತ್ತು ಬ್ಯಾಂಕಿನ ಆಸ್ತಿ ಹಾಗೂ ಸಾಲ-ಹೊಣೆಗಾರಿಕೆಗಳನ್ನು ನಿರ್ವಹಿಸಿ ಠೇವಣಿದಾರರ ಹಣವನ್ನು ಸುರಕ್ಷಿತವಾಗಿ ಮರುಪಾವತಿಸಲು SBI ಮಾಜಿ ಸಿಜಿಎಮ್(CGM) ಗಿರಿಕುಮಾರ್ ನಾಯರ್ ಅವರನ್ನು ಅಧಿಕೃತ ಲಿಕ್ವಿಡೇಟರ್ ಆಗಿ ನೇಮಿಸಲಾಗಿದೆ.

[ಲಿಕ್ವಿಡೇಟರ್ (Liquidator - ಅಧಿಕೃತ ವಿಸರ್ಜನಾಧಿಕಾರಿ) :  ಎಂದರೆ ಒಂದು ಕಂಪನಿ ಅಥವಾ ಬ್ಯಾಂಕ್ ತನ್ನ ವಹಿವಾಟನ್ನು ಮುಚ್ಚುವಾಗ (Winding Up) ಅದರ ಆಸ್ತಿಪಾಸ್ತಿ ಮತ್ತು ಸಾಲ-ಸೋಲಗಳನ್ನು ಕಾನೂನುಬದ್ಧವಾಗಿ ವಿಲೇವಾರಿ ಮಾಡಲು ನೇಮಕಗೊಳ್ಳುವ ಅಧಿಕೃತ ವ್ಯಕ್ತಿ.]

________________________________________________________________________________

ಅಂತಾರಾಷ್ಟ್ರೀಯ ಸುದ್ದಿಗಳು :

ಅಮೆರಿಕದಲ್ಲಿ AI ಮತ್ತು ಇನ್‌ಫ್ಲುಯೆನ್ಸರ್ ರಾಜಕೀಯ ಪ್ರಚಾರ ನಿಯಂತ್ರಣ ಮಸೂದೆ

ಅಮೆರಿಕ ಚುನಾವಣೆಗಳಲ್ಲಿ ಮತದಾರರನ್ನು ತಪ್ಪುದಾರಿಗೆ ಎಳೆಯುವುದನ್ನು ತಡೆಯಲು ಡೆಮಾಕ್ರಟಿಕ್ ನಾಯಕರು ಮಂಡಿಸಿರುವ ಹೊಸ ಮಸೂದೆಯು, ರಾಜಕಾರಣಿಗಳ ಧ್ವನಿ ಅಥವಾ ಚಹರೆಯನ್ನು ಕೃತಕ ಬುದ್ಧಿಮತ್ತೆ (AI Deepfakes) ಮೂಲಕ ದುರ್ಬಳಕೆ ಮಾಡಿಕೊಂಡು ಸೃಷ್ಟಿಸುವ ನಕಲಿ ಜಾಹೀರಾತುಗಳನ್ನು ಸಂಪೂರ್ಣವಾಗಿ ನಿಷೇಧಿಸುವುದಲ್ಲದೆ, ಸೋಶಿಯಲ್ ಮೀಡಿಯಾ ಇನ್‌ಫ್ಲುಯೆನ್ಸರ್‌ಗಳು ಹಣ ಪಡೆದು ಮಾಡುವ ಎಲ್ಲಾ ರೀತಿಯ ರಾಜಕೀಯ ಪ್ರಚಾರದ ಪೋಸ್ಟ್‌ಗಳನ್ನು ‘ಸ್ಪಾನ್ಸರ್ಡ್ ಪ್ರಚಾರ’ ಎಂದು ಸ್ಪಷ್ಟವಾಗಿ ನಮೂದಿಸುವುದನ್ನು ಕಡ್ಡಾಯಗೊಳಿಸುವ ಮೂಲಕ ಚುನಾವಣಾ ಪಾರದರ್ಶಕತೆಯನ್ನು ಹೆಚ್ಚಿಸುವ ಪ್ರಮುಖ ಗುರಿಯನ್ನು ಹೊಂದಿದೆ.

------------------------------------

ಭಾರತ–ಅಮೆರಿಕ ರಕ್ಷಣೆ, ನಾಗರಿಕ ಪರಮಾಣು ಮತ್ತು ತಂತ್ರಜ್ಞಾನ ಸಹಕಾರ ಬಲವರ್ಧನೆ

ಅಮೆರಿಕದ ಕ್ಯಾಲಿಫೋರ್ನಿಯಾದ Hoover Institution ನಲ್ಲಿ ನಡೆದ ಭಾರತ–ಅಮೆರಿಕ ದುಂಡುಮೇಜಿನ ಚರ್ಚೆಯಲ್ಲಿ ಉಭಯ ದೇಶಗಳು ರಕ್ಷಣೆ, ನಾಗರಿಕ ಪರಮಾಣು ಮತ್ತು ಉನ್ನತ ತಂತ್ರಜ್ಞಾನ ಸಹಕಾರವನ್ನು ಮತ್ತಷ್ಟು ಬಲಪಡಿಸುವ ಬಗ್ಗೆ ಒತ್ತು ನೀಡಿದವು. ಭಾರತದ SHANTI Act ನಾಗರಿಕ ಪರಮಾಣು ಸಹಕಾರಕ್ಕೆ ಸಂಬಂಧಿಸಿದ ಹೊಣೆಗಾರಿಕೆ ವ್ಯವಸ್ಥೆಯನ್ನು ಸರಳಗೊಳಿಸುವ ಮಹತ್ವದ ಹೆಜ್ಜೆಯಾಗಿದೆ ಎಂದು ಅಮೆರಿಕ ಸ್ವಾಗತಿಸಿದೆ. ಜೊತೆಗೆ, ರಕ್ಷಣಾ ಸಹಕಾರವನ್ನು ನೆಲ, ಸಮುದ್ರ, ವಾಯು, ಬಾಹ್ಯಾಕಾಶ ಮತ್ತು ಸೈಬರ್ ಕ್ಷೇತ್ರಗಳಲ್ಲಿ ಇನ್ನಷ್ಟು ಗಟ್ಟಿಗೊಳಿಸುವ ಕುರಿತು ಚರ್ಚಿಸಲಾಯಿತು

----------------------------------

'ವಿಶ್ವ ಮಾನವ ಕಳ್ಳಸಾಗಣೆ ವಿರೋಧಿ ದಿನ' ಜುಲೈ 30

ಪ್ರತಿ ವರ್ಷ ಜುಲೈ 30 ರಂದು ಆಚರಿಸಲಾಗುವ 'ವಿಶ್ವ ಮಾನವ ಕಳ್ಳಸಾಗಣೆ ವಿರೋಧಿ ದಿನ'ದ 2026 ರ ಧೈಯವಾಕ್ಯ "Trapped Behind the Scam" ಆಗಿದ್ದು, ಇದು ನಕಲಿ ಉದ್ಯೋಗಾವಕಾಶಗಳ ಮೂಲಕ ಯುವಕರನ್ನು ಆಕರ್ಷಿಸಿ ಸೈಬರ್ ವಂಚನೆ, ಫಿಶಿಂಗ್ ಮತ್ತು ಬಲವಂತದ ಅಪರಾಧಗಳಿಗೆ ತಳ್ಳುವ ಜಾಗತಿಕ ಜಾಲದ ಮೇಲೆ ಬೆಳಕು ಚೆಲ್ಲುತ್ತದೆ; ಇದನ್ನು ತಡೆಯಲು ಭಾರತ ಸರ್ಕಾರವು ಭಾರತೀಯ ನ್ಯಾಯ ಸಂಹಿತೆ (BNS) ಸೆಕ್ಷನ್ 143, ಅನೈತಿಕ ಸಂಚಾರ (ತಡೆ) ಕಾಯ್ದೆ, ಮಾಹಿತಿ ತಂತ್ರಜ್ಞಾನ (IT) ಕಾಯ್ದೆ 2000 ಮತ್ತು ವಿದೇಶಾಂಗ ಸಚಿವಾಲಯದ ಸುರಕ್ಷಿತ ವಲಸೆ ಮಾರ್ಗಸೂಚಿಗಳನ್ನು ಕಟ್ಟುನಿಟ್ಟಾಗಿ ಜಾರಿಗೆ ತಂದಿದೆ.

________________________________________________________________________________

27 & 28 Current Affairs ಪ್ರಚಲಿತ ವಿದ್ಯಮಾನಗಳು

 

ರಾಜ್ಯ ಸುದ್ದಿಗಳು :

------------------------------

________________________________________________________________________________

ರಾಷ್ಟ್ರೀಯ ಸುದ್ದಿಗಳು :

ಜುಲೈ 26 : ಕಾರ್ಗಿಲ್ ವಿಜಯೋತ್ಸವ

27ನೇ ಕಾರ್ಗಿಲ್ ವಿಜಯೋತ್ಸವ: ಶೌರ್ಯದ ಸ್ಮರಣೆ ಹಾಗೂ ರಕ್ಷಣಾ ಸುಧಾರಣೆಗಳ ಸಮಗ್ರ ನೋಟ

1999ರಲ್ಲಿ ಶ್ರೀನಗರ-ಲೇಹ್ ಸಂಪರ್ಕವನ್ನು ತಡೆಯಲು ಯತ್ನಿಸಿದ ಪಾಕ್ ನುಸುಳುಕೋರರ ವಿರುದ್ಧ ಭಾರತೀಯ ಭೂಸೇನೆಯ ‘ಆಪರೇಷನ್ ವಿಜಯ್’ ಮತ್ತು ವಾಯುಪಡೆಯ ‘ಆಪರೇಷನ್ ಸಫೇದ್ ಸಾಗರ್’ ಜಂಟಿ ಕಾರ್ಯಾಚರಣೆಗಳ ಮೂಲಕ ತೋಲೋಲಿಂಗ್ ಹಾಗೂ ಟೈಗರ್ ಹಿಲ್ ಸೇರಿ ಪ್ರಮುಖ ಶಿಖರಗಳನ್ನು ಮರುವಶಪಡಿಸಿಕೊಂಡು ಸಾಧಿಸಿದ 27ನೇ ವರ್ಷದ ಕಾರ್ಗಿಲ್ ವಿಜಯದ ನೆನಪಿಗಾಗಿ ಜುಲೈ 26ರಂದು ಈ ದಿನವನ್ನು ಗೌರವಿಸಲಾಗುತ್ತಿದ್ದು, ಕ್ಯಾಪ್ಟನ್ ವಿಕ್ರಮ್ ಬಾತ್ರಾ ಸೇರಿದಂತೆ ಪರಮವೀರ ಚಕ್ರ ಪುರಸ್ಕೃತ ರಣಧೀರರ ಅಪ್ರತಿಮ ತ್ಯಾಗವನ್ನು ಸ್ಮರಿಸುವುದರ ಜೊತೆಗೆ, ಕಾರ್ಗಿಲ್ ವಿಮರ್ಶಾ ಸಮಿತಿಯ ಶಿಫಾರಸಿನಂತೆ ಸಿಡಿಎಸ್ (CDS) ಹುದ್ದೆ, NTRO, DIA ಸಂಸ್ಥೆಗಳು ಹಾಗೂ ಆಧುನಿಕ ಸಮರ ತಂತ್ರಜ್ಞಾನಗಳ ಅಳವಡಿಕೆಯೊಂದಿಗೆ ದೇಶದ ರಕ್ಷಣಾ ಕ್ಷೇತ್ರದಲ್ಲಿ ಕ್ರಾಂತಿಕಾರಿ ಸುಧಾರಣೆಗಳನ್ನು ತರಲಾಯಿತು.

----------------------------------

ಗ್ಲ್ಯಾಸ್ಗೋ ಕಾಮನ್‌ವೆಲ್ತ್ ಗೇಮ್ಸ್ 2026: ಮೀರಾಬಾಯಿ ಚಾನು ಐತಿಹಾಸಿಕ ಸಾಧನೆ

ಗ್ಲ್ಯಾಸ್ಗೋದಲ್ಲಿ ನಡೆಯುತ್ತಿರುವ 2026ರ ಕಾಮನ್‌ವೆಲ್ತ್ ಗೇಮ್ಸ್‌ನ ಮಹಿಳೆಯರ 48 ಕೆಜಿ ವೇಟ್‌ಲಿಫ್ಟಿಂಗ್ ವಿಭಾಗದಲ್ಲಿ ಮಣಿಪುರದ 31 ವರ್ಷದ ಮೀರಾಬಾಯಿ ಚಾನು ಅವರು ಸ್ನ್ಯಾಚ್‌ನಲ್ಲಿ 85 ಕೆಜಿ ಹಾಗೂ ಕ್ಲೀನ್ ಅಂಡ್ ಜರ್ಕ್‌ನಲ್ಲಿ 105 ಕೆಜಿ ಸೇರಿ ಒಟ್ಟು 190 ಕೆಜಿ ತೂಕ ಎತ್ತುವ ಮೂಲಕ ಗೇಮ್ಸ್ ದಾಖಲೆಯೊಂದಿಗೆ ಭಾರತಕ್ಕೆ ಚೊಚ್ಚಲ ಚಿನ್ನದ ಪದಕ ತಂದುಕೊಟ್ಟಿದ್ದಲ್ಲದೆ, ಸತತ 3ನೇ ಬಾರಿ (ಹ್ಯಾಟ್ರಿಕ್) ಸ್ವರ್ಣ ಗೆದ್ದು ಒಟ್ಟಾರೆಯಾಗಿ ತಮ್ಮ 4ನೇ ಸಿಡಬ್ಲ್ಯೂಜಿ ಪದಕದೊಂದಿಗೆ ನೂತನ ಇತಿಹಾಸ ಬರೆದಿದ್ದಾರೆ.

(ರಜತ ಪದಕ ಗೆದ್ದ ನೈಜೀರಿಯಾದ ರಫ್ ಅಸುಕ್ವೋ ನಯಾಂಗ್ (168 ಕೆಜಿ) ಅವರಿಗಿಂತ 22 ಕೆಜಿ ಹೆಚ್ಚಿನ ತೂಕ ಎತ್ತಿ ಭರ್ಜರಿ ಜಯ ದಾಖಲಿಸಿದರು.)

ಕಾಮನ್‌ವೆಲ್ತ್ ಗೇಮ್ಸ್ ನಲ್ಲಿ ಮೀರಾಬಾಯಿ ಚಾನು ಅವರ ಸಾಧನೆ (ಹ್ಯಾಟ್ರಿಕ್ ಚಿನ್ನ):

ಮೀರಾಬಾಯಿ ಚಾನು ಅವರು ಕಾಮನ್‌ವೆಲ್ತ್ ಗೇಮ್ಸ್‌ನಲ್ಲಿ ಸತತ ಮೂರನೇ ಬಾರಿ ಚಿನ್ನದ ಪದಕ ಗೆದ್ದು 'ಹ್ಯಾಟ್ರಿಕ್ ಸ್ವರ್ಣ' ಸಾಧನೆ ಮಾಡಿದ್ದಾರೆ. ಇದು ಕಾಮನ್‌ವೆಲ್ತ್ ಗೇಮ್ಸ್ ಇತಿಹಾಸದಲ್ಲಿ ಅವರ ಒಟ್ಟಾರೆ 4ನೇ ಪದಕವಾಗಿದೆ:

2014 (ಗ್ಲ್ಯಾಸ್ಗೋ): ಬೆಳ್ಳಿ ಪದಕ

2018 (ಗೋಲ್ಡ್ ಕೋಸ್ಟ್): ಚಿನ್ನದ ಪದಕ

2022 (ಬರ್ಮಿಂಗ್‌ಹ್ಯಾಮ್): ಚಿನ್ನದ ಪದಕ

2026 (ಗ್ಲ್ಯಾಸ್ಗೋ): ಚಿನ್ನದ ಪದಕ

-----------------------------------

ಭಾರತಕ್ಕೆ 45ನೇ ವಿಶ್ವ ಪಾರಂಪರಿಕ ತಾಣವಾಗಿ ಸಾರನಾಥ್ ಸೇರ್ಪಡೆ :

ದಕ್ಷಿಣ ಕೊರಿಯಾದ ಬುಸಾನ್‌ನಲ್ಲಿ ನಡೆದ ಯುನೆಸ್ಕೋ ವಿಶ್ವ ಪಾರಂಪರಿಕ ಸಮಿತಿಯ 48ನೇ ಅಧಿವೇಶನದಲ್ಲಿ, ಗೌತಮ ಬುದ್ಧನು ಬೋಧಗಯೆಯಲ್ಲಿ ಜ್ಞಾನೋದಯ ಪಡೆದ ನಂತರ ತನ್ನ ಐವರು ಶಿಷ್ಯರಿಗೆ ಪ್ರಥಮ ಧರ್ಮೋಪದೇಶ ನೀಡಿದ (ಧಮ್ಮಚಕ್ಕಪ್ಪವತ್ತನ ಕೃತ್ಯ) ಹಾಗೂ ಚತುರಾರ್ಯ ಸತ್ಯಗಳು ಮತ್ತು ಅಷ್ಟಾಂಗ ಮಾರ್ಗಗಳನ್ನು ಬೋಧಿಸಿದ ಉತ್ತರ ಪ್ರದೇಶದ ವಾರಣಾಸಿ ಸಮೀಪದ ಐತಿಹಾಸಿಕ ಬೌದ್ಧ ಧಾರ್ಮಿಕ ಕ್ಷೇತ್ರವಾದ ಸಾರನಾಥ್ ಯುನೆಸ್ಕೋ ವಿಶ್ವ ಪಾರಂಪರಿಕ ತಾಣಗಳ ಪಟ್ಟಿಗೆ ಅಧಿಕೃತವಾಗಿ ಸೇರ್ಪಡೆಯಾಗಿದ್ದು, ಇದರೊಂದಿಗೆ ಭಾರತದಲ್ಲಿನ ಯುನೆಸ್ಕೋ ತಾಣಗಳ ಒಟ್ಟು ಸಂಖ್ಯೆ 45ಕ್ಕೆ ಏರಿಕೆಯಾಗಿ, ದೇಶದ ಸಾಂಸ್ಕೃತಿಕ ಪರಂಪರೆಗೆ ಜಾಗತಿಕ ಮಟ್ಟದಲ್ಲಿ ಮತ್ತೊಂದು ಮಹತ್ವದ ಗೌರವ ಪಾತ್ರವಾಗಿದೆ.

---------------------------------------

ಆರ್‌ಬಿಐನಿಂದ ಹೊಸ  ₹10 ಮತ್ತು ₹20 ಮುಖಬೆಲೆಯ ಸುಧಾರಿತ ಪಾಲಿಮರ್ ನೋಟುಗಳ ಪ್ರಾಯೋಗಿಕ ಬಳಕೆ

ಕಾಗದದ ನೋಟುಗಳಿಗಿಂತ ಮೂರರಿಂದ ಐದು ಪಟ್ಟು ಹೆಚ್ಚು ಬಾಳಿಕೆ ಬರುವ, ನೀರು ಹಾಗೂ ಕೊಳಕು ನಿರೋಧಕ ಶಕ್ತಿ ಹೊಂದಿರುವ ಮತ್ತು ನಕಲಿ ನೋಟುಗಳ ಹಾವಳಿ ತಡೆಯಲು ಅತ್ಯಾಧುನಿಕ ಭದ್ರತಾ ವೈಶಿಷ್ಟ್ಯಗಳನ್ನು ಒಳಗೊಂಡ ₹10 ಹಾಗೂ ₹20 ಮೌಲ್ಯದ ತಲಾ 100 ಕೋಟಿ ಪಾಲಿಮರ್ (ಪ್ಲಾಸ್ಟಿಕ್) ನೋಟುಗಳನ್ನು ಪ್ರಾಯೋಗಿಕವಾಗಿ ಚಲಾವಣೆ ಮಾಡಲು ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಸಲ್ಲಿಸಿದ್ದ ಪ್ರಸ್ತಾಪಕ್ಕೆ ಕೇಂದ್ರ ಹಣಕಾಸು ಸಚಿವಾಲಯ ಅನುಮೋದನೆ ನೀಡಿದ್ದು, ಪ್ರಸ್ತುತ ಚಲಾವಣೆಯಲ್ಲಿರುವ ಕಾಗದದ ನೋಟುಗಳನ್ನು ಹಿಂಪಡೆಯದೆ ಇವೆರಡನ್ನೂ ಒಟ್ಟಿಗೆ ಚಲಾವಣೆಯಲ್ಲಿಡಲು ನಿರ್ಧರಿಸಿದೆ.

ಭಾರತೀಯ ರಿಸರ್ವ್ ಬ್ಯಾಂಕ್ ಕಾಯ್ದೆ, 1934 ರ ಸೆಕ್ಷನ್ 25 ರ (Section 25 of RBI Act, 1934) ಅಡಿಯಲ್ಲಿ ಈ ಪ್ರಸ್ತಾಪನೆಯನ್ನು ಆರ್‌ಬಿಐ ಕೇಂದ್ರ ಸರ್ಕಾರಕ್ಕೆ ಸಲ್ಲಿಸಿತ್ತು.

ಆಸ್ಟ್ರೇಲಿಯಾ 1988 ರಲ್ಲೇ ಸಂಪೂರ್ಣವಾಗಿ ಪಾಲಿಮರ್ ನೋಟುಗಳನ್ನು ಅಳವಡಿಸಿಕೊಂಡ ಮೊದಲ ದೇಶವಾಗಿದೆ.

ಯುಕೆ (UK), ಕೆನಡಾ ಮತ್ತು ನ್ಯೂಜಿಲ್ಯಾಂಡ್ ಸೇರಿದಂತೆ ಪ್ರಪಂಚದ ಹಲವು ಪ್ರಮುಖ ರಾಷ್ಟ್ರಗಳು ಪ್ರಸ್ತುತ ಪಾಲಿಮರ್ ಬ್ಯಾಂಕ್‌ನೋಟುಗಳನ್ನು ಯಶಸ್ವಿಯಾಗಿ ಚಲಾವಣೆಯಲ್ಲಿ ಬಳಸುತ್ತಿವೆ.

---------------------------------

ISSF ವಿಶ್ವಕಪ್ 2026 ಭಾರತೀಯ ಶೂಟರ್‌ಗಳಾದ 'ಈಶಾ ಸಿಂಗ್‌'ಗೆ ಸ್ವರ್ಣ ಹಾಗೂ 'ಮನು ಭಾಕರ್‌'ಗೆ ಕಾಂಸ್ಯ ಪದಕದ 

ಚೀನಾದ ಹ್ಯಾಂಗ್‌ಝೌನಲ್ಲಿ ನಡೆದ ISSF ವಿಶ್ವಕಪ್ 2026ರ ಮಹಿಳೆಯರ 25 ಮೀಟರ್ ಪಿಸ್ತೂಲ್ ವಿಭಾಗದಲ್ಲಿ, 21 ವರ್ಷದ ಭಾರತೀಯ ಶೂಟರ್ ಈಶಾ ಸಿಂಗ್ ಫೈನಲ್‌ನಲ್ಲಿ 40 ಹಿಟ್‌ಗಳನ್ನು ಗಳಿಸಿ ಚಿನ್ನದ ಪದಕ ಗೆಲ್ಲುವ ಮೂಲಕ ಡಿಸೆಂಬರ್‌ನಲ್ಲಿ ಇಟಲಿಯ ರೋಮ್‌ನಲ್ಲಿ ನಡೆಯಲಿರುವ 'ISSF ವಿಶ್ವಕಪ್ ಫೈನಲ್ 2026'ಗೆ ನೇರ ಅರ್ಹತೆ ಪಡೆದಿದ್ದರೆ, ಮತ್ತೋರ್ವ ಖ್ಯಾತ ಶೂಟರ್ ಮನು ಭಾಕರ್ ತೀವ್ರ ಪೈಪೋಟಿಯ ಶೂಟ್-ಆಫ್ ಸುತ್ತಿನಲ್ಲಿ 28 ಹಿಟ್‌ಗಳೊಂದಿಗೆ ಕಾಂಸ್ಯ ಪದಕವನ್ನು ತಮ್ಮದಾಗಿಸಿಕೊಂಡು ದೇಶಕ್ಕೆ ಹೆಮ್ಮೆ ತಂದಿದ್ದಾರೆ.

ISSF ಕುರಿತು ಸಾಮಾನ್ಯ ಜ್ಞಾನ :

ವಿಸ್ತೃತ ರೂಪ : International Shooting Sport Federation (ಅಂತರರಾಷ್ಟ್ರೀಯ ಶೂಟಿಂಗ್ ಸ್ಪೋರ್ಟ್ಸ್ ಫೆಡರೇಷನ್)

ಸ್ಥಾಪನೆ: 17 ಜುಲೈ 1907

ಪ್ರಧಾನ ಕಚೇರಿ (Headquarters): ಮ್ಯೂನಿಕ್ (Munich), ಜರ್ಮನಿ

ಕಾರ್ಯ: ಜಾಗತಿಕ ಮಟ್ಟದಲ್ಲಿ ರೈಫಲ್, ಪಿಸ್ತೂಲ್ ಮತ್ತು ಶಾಟ್‌ಗನ್ ವಿಭಾಗಗಳ ಒಲಿಂಪಿಕ್ ಹಾಗೂ ಇತರೆ ಅಂತರರಾಷ್ಟ್ರೀಯ ಶೂಟಿಂಗ್ ಸ್ಪರ್ಧೆಗಳ ನಿಯಮಗಳನ್ನು ರೂಪಿಸಿ, ಆಯೋಜಿಸಿ ಮತ್ತು ನಿರ್ವಹಿಸುವ ವಿಶ್ವದ ಪ್ರಮುಖ ಶೂಟಿಂಗ್ ಕ್ರೀಡಾ ಸಂಸ್ಥೆಯಾಗಿದೆ.

-------------------------------------

BS-VI ವಾಹನಗಳ PUCC ಮಾನ್ಯತೆ ಅವಧಿ ವಿಸ್ತರಣೆ: ಕೇಂದ್ರ ಸರ್ಕಾರದ ಹೊಸ ಕರಡು ಅಧಿಸೂಚನೆ

PUCC : Pollution Under Control Certificate 

ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯವು (MoRTH) ಜಾರಿಗೆ ತರಲು ಉದ್ದೇಶಿಸಿರುವ 'PUCC 3.0' ಯೋಜನೆಯ ಕರಡು ಅಧಿಸೂಚನೆಯ ಪ್ರಕಾರ, ಅತ್ಯಾಧುನಿಕ ಹಾಗೂ ಕಡಿಮೆ ಮಾಲಿನ್ಯ ಉಂಟುಮಾಡುವ 6 ವರ್ಷದೊಳಗಿನ BS-VI ಖಾಸಗಿ ವಾಹನಗಳ ಮಾಲಿನ್ಯ ನಿಯಂತ್ರಣ ಪ್ರಮಾಣಪತ್ರದ (PUCC) ಸಿಂಧುತ್ವವನ್ನು ಪ್ರಸ್ತುತ ಇರುವ 1 ವರ್ಷದಿಂದ 3 ವರ್ಷಗಳಿಗೆ ಹೆಚ್ಚಿಸಲು ಪ್ರಸ್ತಾಪಿಸಲಾಗಿದ್ದು, 6 ರಿಂದ 10 ವರ್ಷದ BS-VI ವಾಹನಗಳಿಗೆ 1 ವರ್ಷ, ವಾಣಿಜ್ಯ ವಾಹನಗಳಿಗೆ 2 ವರ್ಷ ಹಾಗೂ ಹೆಚ್ಚು ಮಾಲಿನ್ಯ ಹೊರಸೂಸುವ ಹಳೆಯ BS-I ರಿಂದ BS-IV ವಾಹನಗಳಿಗೆ ಪ್ರತಿ 3 ರಿಂದ 6 ತಿಂಗಳಿಗೊಮ್ಮೆ ಕಡ್ಡಾಯ ತಪಾಸಣೆಯನ್ನು ನಿಗದಿಪಡಿಸುವ ಮೂಲಕ ಸಾರ್ವಜನಿಕರ ಮೇಲಿನ ಆರ್ಥಿಕ ಹಾಗೂ ಆಡಳಿತಾತ್ಮಕ ಹೊರೆಯನ್ನು ತಗ್ಗಿಸಲು ಮುಂದಾಗಿದೆ.

________________________________________________________________________________

ಅಂತಾರಾಷ್ಟ್ರೀಯ ಸುದ್ದಿಗಳು :

ಐಎನ್‌ಎಸ್ ಸುದರ್ಶಿನಿಯ ಮಹತ್ವದ ಜಾಗತಿಕ ಸಾಗರಯಾನ

ಅಮೆರಿಕದ 250ನೇ ಸ್ವಾತಂತ್ರ್ಯೋತ್ಸವದ 'ಸೇಲ್ 250' ಕಾರ್ಯಕ್ರಮದಲ್ಲಿ ಭಾರತೀಯ ನೌಕಾಪಡೆಯ ತರಬೇತಿ ಹಾಯಿದೋಣಿ 'ಐಎನ್‌ಎಸ್ ಸುದರ್ಶಿನಿ' (INS Sudarshini) ಯಶಸ್ವಿಯಾಗಿ ಪಾಲ್ಗೊಂಡು, ತನ್ನ 'ಲೋಕಾಯನ್ 26' ಸುದೀರ್ಘ ಸಾಗರಯಾನದ ಭಾಗವಾಗಿ ನಾರ್ಫೋಕ್, ನ್ಯೂಯಾರ್ಕ್ ಹಾಗೂ ಬಾಸ್ಟನ್ ಬಂದರುಗಳನ್ನು ಭೇಟಿ ಮಾಡಿ, ಭಾರತದ ಕಡಲ ಪರಂಪರೆ, ಸಾಹಸ ಸಾಮರ್ಥ್ಯ ಮತ್ತು ಸೌಹಾರ್ದತೆಯ ಸಂದೇಶವನ್ನು ಜಾಗತಿಕ ಮಟ್ಟದಲ್ಲಿ ಪಸರಿಸುತ್ತಾ ಇದೀಗ ಪೋರ್ಚುಗಲ್‌ನ ಪೋಂಟಾ ಡೆಲ್ಗಾಡಾ ಕಡೆಗೆ ಪ್ರಯಾಣ ಬೆಳೆಸಿದೆ.

------------------------------------

'ವಿಶ್ವ ನಿಸರ್ಗ ಸಂರಕ್ಷಣಾ ದಿನ' - ಜುಲೈ 28

ಪ್ರತಿ ವರ್ಷ ಜುಲೈ 28 ರಂದು ಆಚರಿಸಲಾಗುವ ವಿಶ್ವ ಪ್ರಕೃತಿ ಸಂರಕ್ಷಣಾ ದಿನದ ಅಂಗವಾಗಿ, 2030 ರ '30×30' ಜಾಗತಿಕ ಜೀವವೈವಿಧ್ಯತೆಯ ಗುರಿಯ ಅರ್ಧದಾರಿಯ ಮೈಲಿಗಲ್ಲಾಗಿರುವ 2026 ನೇ ಸಾಲಿನಲ್ಲಿ, ನೀರು, ಗಾಳಿ, ಅರಣ್ಯದಂತಹ ನೈಸರ್ಗಿಕ ಸಂಪನ್ಮೂಲಗಳನ್ನು ಸುಸ್ಥಿರವಾಗಿ ಬಳಸುವುದು, ಅಳಿವಿನಂಚಿನಲ್ಲಿರುವ 48,000 ಕ್ಕೂ ಹೆಚ್ಚು ಪ್ರಭೇದಗಳನ್ನು ರಕ್ಷಿಸುವುದು, ಹಾಳಾಗಿರುವ ಪರಿಸರ ವ್ಯವಸ್ಥೆಯನ್ನು ಮರುಸ್ಥಾಪಿಸುವುದು ಹಾಗೂ ಪ್ಲಾಸ್ಟಿಕ್ ಮಾಲಿನ್ಯ ತಡೆಗೆ ಚಕ್ರೀಯ ಅರ್ಥವ್ಯವಸ್ಥೆಯನ್ನು ಉತ್ತೇಜಿಸುವ ಮೂಲಕ ಭೂಮಿ ಮತ್ತು ಸಾಗರಗಳ ನೈಸರ್ಗಿಕ ಸಮತೋಲನ ಕಾಪಾಡುವ ಜಾಗತಿಕ ಜಾಗೃತಿ ಮೂಡಿಸಲಾಗುತ್ತಿದೆ.

------------------------------------

ಚೀನಾ ಕೃತಕ ಸೂರ್ಯನಿಗಾಗಿ ಜಗತ್ತಿನ ಅತಿದೊಡ್ಡ ಸೂಪರ್‌ಕಂಡಕ್ಟಿಂಗ್ ಮ್ಯಾಗ್ನೆಟ್ ಯಶಸ್ವಿ ಪರೀಕ್ಷೆ

ಚೀನಾದ 'ಇನ್‌ಸ್ಟಿಟ್ಯೂಟ್ ಆಫ್ ಪ್ಲಾಸ್ಮಾ ಫಿಸಿಕ್ಸ್' (Chinese Academy of Sciences) ತನ್ನ ಕೃತಕ ಸೂರ್ಯ ಯೋಜನೆಯಲ್ಲಿ ಶೂನ್ಯ ವಿದ್ಯುತ್ ನಿರೋಧಕತೆಯ ತಂತ್ರಜ್ಞಾನವನ್ನು ಬಳಸಿ, 100 ಮಿಲಿಯನ್ °C ಗಿಂತಲೂ ಹೆಚ್ಚಿನ ಅತಿಯಾದ ತಾಪಮಾನದ ಪ್ಲಾಸ್ಮಾವನ್ನು ರಿಯಾಕ್ಟರ್ ಗೋಡೆಗಳಿಗೆ ಸ್ಪರ್ಶಿಸದಂತೆ ಸುರಕ್ಷಿತವಾಗಿ ನಿಯಂತ್ರಿಸಲು ಹಾಗೂ ಅನಂತ ಪರಿಶುದ್ಧ ವಿದ್ಯುತ್ ಉತ್ಪಾದಿಸುವ ನಿಟ್ಟಿನಲ್ಲಿ 582 ಟನ್ ತೂಕದ ಜಗತ್ತಿನ ಅತಿ ದೊಡ್ಡ D-ಆಕಾರದ 'ಟೋರಾಯ್ಡಲ್ ಫೀಲ್ಡ್ ಸೂಪರ್‌ಕಂಡಕ್ಟಿಂಗ್ ಮ್ಯಾಗ್ನೆಟ್' ಅನ್ನು ಸ್ವದೇಶಿ ತಂತ್ರಜ್ಞಾನದ ಮೂಲಕ ಯಶಸ್ವಿಯಾಗಿ ನಿರ್ಮಿಸಿ ಪರೀಕ್ಷಿಸಿದೆ.

________________________________________________________________________________

25 & 26 Current Affairs ಪ್ರಚಲಿತ ವಿದ್ಯಮಾನಗಳು

 

ರಾಜ್ಯ ಸುದ್ದಿಗಳು :

ಬಿಪಿಎಲ್ ಪಡಿತರ ವ್ಯವಸ್ಥೆಯಲ್ಲಿ ಬೃಹತ್ ಪರಿಷ್ಕರಣೆ: ಆಹಾರ ಇಲಾಖೆಯ ಪ್ರಮುಖ ನಿರ್ಧಾರಗಳು

'ಆಡಳಿತ ಸುಧಾರಣಾ ಆಯೋಗದ' ಶಿಫಾರಸ್ಸುಗಳು :

ಆಡಳಿತ ಸುಧಾರಣಾ ಆಯೋಗದ ಶಿಫಾರಸಿನಂತೆ ಬಿಪಿಎಲ್ ಪಡಿತರ ಚೀಟಿಯ ವಾರ್ಷಿಕ ಆದಾಯ ಮಿತಿಯನ್ನು ₹1.20 ಲಕ್ಷದಿಂದ ₹3 ಲಕ್ಷಕ್ಕೆ ಏರಿಸಿ ಸಚಿವ ಸಂಪುಟದ ಅನುಮೋದನೆಗೆ ಸಲ್ಲಿಸಲು ನಿರ್ಧರಿಸಿರುವ ಕರ್ನಾಟಕ ಸರ್ಕಾರವು, ಯಾವುದೇ ಕಾರ್ಡ್ ರದ್ದುಗೊಳಿಸದೇ ತಾತ್ಕಾಲಿಕವಾಗಿ ಎಪಿಎಲ್‌ಗೆ ವರ್ಗಾಯಿಸುವ ಭರವಸೆ ನೀಡಿದ್ದು, ಮುಂದಿನ 2 ತಿಂಗಳಲ್ಲಿ ₹6,000 ಕೋಟಿ ವೆಚ್ಚದಲ್ಲಿ 'ಇಂದಿರಾ ಕಿಟ್' ಯೋಜನೆ ಚಾಲನೆ, 4.42 ಕೋಟಿ ಫಲಾನುಭವಿಗಳಿಗೆ 'ಅನ್ನಭಾಗ್ಯ' ಅಡಿಯಲ್ಲಿ ತಲಾ 10 ಕೆ.ಜಿ ಧಾನ್ಯ ವಿತರಣೆ, ಅಕ್ರಮ ತಡೆಯಲು ಗೋದಾಮುಗಳಲ್ಲಿ ಸಿಸಿಟಿವಿ ಹಾಗೂ ಸಾರಿಗೆ ವಾಹನಗಳಿಗೆ ಜಿಪಿಎಸ್ ಕಡ್ಡಾಯ, 20,259 ನ್ಯಾಯಬೆಲೆ ಅಂಗಡಿಗಳಲ್ಲಿ ಸಹಾಯವಾಣಿ ಮಾಹಿತಿ ಪ್ರದರ್ಶನ ಮತ್ತು ತೂಕ ತಪಾಸಣೆಗೆ 33 ವಿಶೇಷ ವಾಹನಗಳ ನಿಯೋಜನೆಯಂತಹ ಕ್ರಾಂತಿಕಾರಿ ಕ್ರಮಗಳನ್ನು ಕೈಗೊಂಡಿದೆ.

------------------------------

________________________________________________________________________________

ರಾಷ್ಟ್ರೀಯ ಸುದ್ದಿಗಳು :

ಪ್ರಾಜೆಕ್ಟ್ ಕುಶ್' ವಾಯು ರಕ್ಷಣಾ ಕ್ಷಿಪಣಿ ಯಶಸ್ವಿ ಪರೀಕ್ಷೆ

ಆತ್ಮನಿರ್ಭರ ಭಾರತ ಯೋಜನೆಯಡಿಯಲ್ಲಿ ಡಿಆರ್‌ಡಿಒ (DRDO) ಸ್ವದೇಶಿ ತಂತ್ರಜ್ಞಾನದೊಂದಿಗೆ ಅಭಿವೃದ್ಧಿಪಡಿಸಿದ 'ಪ್ರಾಜೆಕ್ಟ್ ಕುಶ್' ನ ದೀರ್ಘ ವ್ಯಾಪ್ತಿಯ ಮೇಲ್ಮೈಯಿಂದ ಆಕಾಶಕ್ಕೆ ಚಿಮ್ಮುವ ಕ್ಷಿಪಣಿಯ (LR-SAM : Long-Range Surface-to-Air Missile) ಚೊಚ್ಚಲ ಹಾರಾಟ ಪರೀಕ್ಷೆಯು ಒಡಿಶಾದ ಡಾ. ಎ.ಪಿ.ಜೆ. ಅಬ್ದುಲ್ ಕಲಾಂ ದ್ವೀಪದಿಂದ 23 ಜುಲೈ 2026 ರಂದು ಯಶಸ್ವಿಯಾಗಿ ನೆರವೇರಿದ್ದು, ಇದು ಶತ್ರುಗಳ ಯುದ್ಧ ವಿಮಾನ, ಡ್ರೋನ್ ಹಾಗೂ ಕ್ಷಿಪಣಿಗಳನ್ನು ಆಕಾಶದಲ್ಲೇ ಧ್ವಂಸಗೊಳಿಸುವ ಸಾಮರ್ಥ್ಯ ಹೊಂದುವ ಮೂಲಕ ರಷ್ಯಾದ S-400 ವ್ಯವಸ್ಥೆಗೆ ತಟಸ್ಥ ಹಾಗೂ ದೇಶೀಯ ಪರ್ಯಾಯವಾಗಿ ಭಾರತದ ವಾಯು ರಕ್ಷಣಾ ವ್ಯವಸ್ಥೆಯನ್ನು ಬಲಪಡಿಸಿದೆ.

----------------------------------

ವಿಶ್ವ ಚೆಸ್ ನಿಯಂತ್ರಣ ಮಂಡಳಿ (FIDE) ಹಂಗಾಮಿ ಅಧ್ಯಕ್ಷರಾಗಿ ವಿಶ್ವನಾಥನ್ ಆನಂದ್ ಆಯ್ಕೆ

ಯುರೋಪಿಯನ್ ಯೂನಿಯನ್ (EU) ಜಾರಿಗೊಳಿಸಿದ 21ನೇ ನಿರ್ಬಂಧಿತ ವ್ಯಕ್ತಿಗಳ ಪಟ್ಟಿಯಲ್ಲಿ (Sanctions List) ಸೇರ್ಪಡೆಯಾಗಿ ಆಸ್ತಿ ಮುಟ್ಟುಗೋಲು ಹಾಗೂ ಪ್ರಯಾಣ ನಿಷೇಧಕ್ಕೊಳಗಾದ ರಷ್ಯಾದ ಅರ್ಕಾಡಿ ಡೋರ್ಕೋವಿಚ್ ಅವರು ತಮ್ಮ ಅಧ್ಯಕ್ಷೀಯ ಕಾರ್ಯಕಲಾಪಗಳನ್ನು ಸ್ವಯಂಪ್ರೇರಿತವಾಗಿ ಅಮಾನತಿನಲ್ಲಿಟ್ಟಿದ್ದರಿಂದ, ಸಂಸ್ಥೆಯ ಸುಗಮ ಆಡಳಿತ ಹಿತದೃಷ್ಟಿಯಿಂದ ಪ್ರಸ್ತುತ ಉಪಾಧ್ಯಕ್ಷರೂ, ಭಾರತದ ಪ್ರಥಮ ಗ್ರಾಂಡ್‌ಮಾಸ್ಟರ್ ಹಾಗೂ 5 ಬಾರಿಯ ವಿಶ್ವ ಚಾಂಪಿಯನ್ ಆಗಿರುವ ವಿಶ್ವನಾಥನ್ ಆನಂದ್ ಅವರು ಅಂತಾರಾಷ್ಟ್ರೀಯ ಚೆಸ್ ಫೆಡರೇಷನ್‌ನ (FIDE) ಹಂಗಾಮಿ ಅಧ್ಯಕ್ಷರಾಗಿ ಅಧಿಕಾರ ಸ್ವೀಕರಿಸಿದ್ದಾರೆ.

ವಿಶ್ವನಾಥನ್ ಆನಂದ್ ಅವರ ಸಾಧನೆಗಳು ಹಾಗೂ ಹಿನ್ನೆಲೆ

ಜನನ: 11 ಡಿಸೆಂಬರ್ 1969 (ಮೈಲಾಡುತುರೈ, ತಮಿಳುನಾಡು).

ಭಾರತದ ಪ್ರಥಮ ಗ್ರಾಂಡ್‌ಮಾಸ್ಟರ್: 1988 ರಲ್ಲಿ ಭಾರತದ ಅತ್ಯಂತ ಮೊದಲ ಗ್ರಾಂಡ್‌ಮಾಸ್ಟರ್ (GM) ಪಟ್ಟ ಗಳಿಸಿದರು.

5 ಬಾರಿಯ ವಿಶ್ವ ಚಾಂಪಿಯನ್: 2000, 2007, 2008, 2010 ಮತ್ತು 2012 ರ ಸಾಲಿನಲ್ಲಿ ಒಟ್ಟು 5 ಬಾರಿ ವಿಶ್ವ ಚೆಸ್ ಚಾಂಪಿಯನ್ ಆಗಿದ್ದಾರೆ.

ಪ್ರಮುಖ ರಾಷ್ಟ್ರೀಯ ಪ್ರಶಸ್ತಿಗಳು:

ಮೊದಲ ಖೇಲ್ ರತ್ನ ವಿಜೇತ: 1991-92 ರಲ್ಲಿ ದೇಶದ ಅತ್ಯುನ್ನತ ಕ್ರೀಡಾ ಗೌರವವಾದ 'ರಾಜೀವ್ ಗಾಂಧಿ ಖೇಲ್ ರತ್ನ' (ಪ್ರಸ್ತುತ ಮೇಜರ್ ಧ್ಯಾನ್‌ಚಂದ್ ಖೇಲ್ ರತ್ನ) ಪಡೆದ ಮೊದಲ ಕ್ರೀಡಾಪಟು.

ಮೊದಲ ಪದ್ಮವಿಭೂಷಣ ವಿಜೇತ ಕ್ರೀಡಾಪಟು: 2007 ರಲ್ಲಿ ಭಾರತದ 2ನೇ ಅತ್ಯುನ್ನತ ನಾಗರಿಕ ಪ್ರಶಸ್ತಿ 'ಪದ್ಮವಿಭೂಷಣ' ಪಡೆದ ಮೊದಲ ಕ್ರೀಡಾಪಟು ಎನಿಸಿಕೊಂಡರು.

ಇತರ ಪದ್ಮ ಪ್ರಶಸ್ತಿಗಳು: 1987 ರಲ್ಲಿ 'ಪದ್ಮಶ್ರೀ' ಹಾಗೂ 2001 ರಲ್ಲಿ 'ಪದ್ಮಭೂಷಣ' ಪ್ರಶಸ್ತಿ ನೀಡಿ ಗೌರವಿಸಲಾಗಿದೆ.

ಆತ್ಮಕಥೆ: ತಮ್ಮ ಕ್ರೀಡಾ ಅನುಭವಗಳನ್ನಾಧಾರಿಸಿ "Mind Master: Winning Lessons from a Champion's Life" ಎಂಬ ಕೃತಿಯನ್ನು ರಚಿಸಿದ್ದಾರೆ.

------------------------------------

ಭಾರತ-ಮ್ಯಾನ್ಮಾರ್‌ ಅಪರೂಪದ ಖನಿಜ ಪಾಲುದಾರಿಕೆ

ಜಾಗತಿಕವಾಗಿ ಚೀನಾ ಹೊಂದಿರುವ ಅಪರೂಪದ ಭೂ ಖನಿಜಗಳ (REE) ಏಕಸ್ವಾಮ್ಯವನ್ನು ಮೆಟ್ಟಿ ನಿಲ್ಲಲು ಹಾಗೂ ದೇಶದ ವಿದ್ಯುತ್ ವಾಹನ, ಪವನ ಶಕ್ತಿ ಮತ್ತು ರಕ್ಷಣಾ ವಲಯಕ್ಕೆ ಖನಿಜ ಭದ್ರತೆ ಒದಗಿಸಲು, ಮ್ಯಾನ್ಮಾರ್‌ನ ಕಚಿನ್ ರಾಜ್ಯದಲ್ಲಿ ಶೇ. 50 ರಷ್ಟು ಲಭ್ಯವಿರುವ ಈ ಸಂಪನ್ಮೂಲಕ್ಕಾಗಿ ರಾಯಭಾರಿ ಅಭಯ್ ಠಾಕೂರ್ ಹಾಗೂ ನಾಯಕ ಮಿನ್ ಆಂಗ್ ಹ್ಲೈಂಗ್ ಮಾತುಕತೆ ನಡೆಸಿ, ಭಾರತದ ಸಾರ್ವಜನಿಕ ಮತ್ತು ಖಾಸಗಿ ವಲಯದ ಪ್ರಮುಖ ಕಂಪನಿಗಳ ಸಕ್ರಿಯ ಸಹಭಾಗಿತ್ವದೊಂದಿಗೆ ಗಣಿಗಾರಿಕೆ ಒಪ್ಪಂದವನ್ನು ಯಶಸ್ವಿಯಾಗಿ ವಿಸ್ತರಿಸಲಾಗುತ್ತಿದೆ.

ಸಾರ್ವಜನಿಕ ವಲಯದ (PSUs) ಸಂಸ್ಥೆಗಳು: ಭಾರತೀಯ ಅಪರೂಪದ ಭೂ ಖನಿಜಗಳ ನಿಯಮಿತ (IREL - India Rare Earths Limited) ಮತ್ತು ಎನ್‌ಟಿಪಿಸಿ ಮೈನಿಂಗ್ (NTPC Mining) ನಂತಹ ಸಾರ್ವಜನಿಕ ಸಂಸ್ಥೆಗಳು ಇದರಲ್ಲಿ ಭಾಗವಹಿಸಿವೆ.

ಖಾಸಗಿ ವಲಯದ ಕಂಪನಿಗಳು: ಪ್ರಿಎನ್‌ಡಿ ಮೆಟಲ್ಸ್ (PreND Metals), ಹಿಮಾದ್ರಿ ಸ್ಪೆಷಾಲಿಟಿ ಕೆಮಿಕಲ್ಸ್ (Himadri Speciality Chemical) ಹಾಗೂ ಓಷಿಯಾನಿಕ್ ಸ್ಯಾಂಡ್ಸ್ (Oceanic Sands) ನಂತಹ ಖಾಸಗಿ ಕಂಪನಿಗಳು ಸಹ ಸಕ್ರಿಯವಾಗಿ ಪಾಲ್ಗೊಂಡಿವೆ.

ಕಚಿನ್ ರಾಜ್ಯದ ಪ್ರಾಮುಖ್ಯತೆ: ಮ್ಯಾನ್ಮಾರ್‌ನ ಉತ್ತರ ಭಾಗದಲ್ಲಿರುವ 'ಕಚಿನ್' (Kachin) ರಾಜ್ಯ ಒಂದರ ಗಣಿಗಳಿಂದಲೇ ಜಗತ್ತಿನ ಒಟ್ಟು ಅಪರೂಪದ ಭೂ ಖನಿಜಗಳ ಪೂರೈಕೆಯಲ್ಲಿ ಸುಮಾರು ಶೇ. 50 ರಷ್ಟು ಪೂರೈಕೆಯಾಗುತ್ತದೆ.

-----------------------------------

ಭಾರತದ ರಕ್ಷಣಾ ಕ್ಷೇತ್ರದಲ್ಲಿ ಐತಿಹಾಸಿಕ ಸಾಧನೆ: ಪ್ರಥಮ ಸ್ವದೇಶಿ ‘ಎಕ್ಸ್‌ಪೆಂಡೇಬಲ್ ಟರ್ಬೋಜೆಟ್ ಎಂಜಿನ್’ ಹಸ್ತಾಂತರ

DRDO ಸಂಸ್ಥೆಯ ಜಿಟಿಆರ್‌ಇ (GTRE) ವಿನ್ಯಾಸಗೊಳಿಸಿದ ಭಾರತದ ಮೊದಲ 350 ಕೆಜಿ ಥ್ರಸ್ಟ್ ಸಾಮರ್ಥ್ಯದ ಸ್ವದೇಶಿ ‘ಎಕ್ಸ್‌ಪೆಂಡೇಬಲ್ ಟರ್ಬೋಜೆಟ್ ಎಂಜಿನ್’ ಅನ್ನು ಖಾಸಗಿ ಪಾಲುದಾರ ಸಂಸ್ಥೆಯಾದ ಆಜಾದ್ ಎಂಜಿನಿಯರಿಂಗ್‌ ನಿರ್ಮಿಸಿ, ಯಶಸ್ವಿಯಾಗಿ ವೈಮಾನಿಕ ವ್ಯವಸ್ಥೆಗಳ ಡಿಜಿ ಡಾ. ಕೆ. ರಾಜಲಕ್ಷ್ಮಿ ಮೆನನ್ ಹಾಗೂ GTRE ನಿರ್ದೇಶಕ ಡಾ. ಎಸ್. ವಿ. ರಮಣಮೂರ್ತಿ ಅವರಿಗೆ ಅಧಿಕೃತವಾಗಿ ಹಸ್ತಾಂತರಿಸಿದ್ದು, ಕ್ಷಿಪಣಿಗಳು ಹಾಗೂ ಯುಎವಿ (UAV) ಗಳಿಗೆ ಅತ್ಯಗತ್ಯವಾದ ಈ ಕ್ಲಿಷ್ಟಕರ ತಂತ್ರಜ್ಞಾನದಲ್ಲಿ ಸ್ವಾವಲಂಬನೆ ಸಾಧಿಸುವ ಮೂಲಕ ‘ಆತ್ಮನಿರ್ಭರ ಭಾರತ’ ಅಭಿಯಾನಕ್ಕೆ ಭಾರತವು ಮಹತ್ವದ ಬಲ ತುಂಬಿದೆ.

-----------------------------------------

ಅಂತರರಾಷ್ಟ್ರೀಯ ಟೈಪ್ 1 ಮಧುಮೇಹ ಶೃಂಗಸಭೆ 2026: ರಾಜಸ್ಥಾನದ ಜೋಧ್‌ಪುರದಲ್ಲಿ ಸಮಾವೇಶ

ಜುಲೈ 23, 2026 ರಂದು ನವದೆಹಲಿಯಲ್ಲಿ ಲೋಗೋ ಹಾಗೂ ಕಾರ್ಯಕ್ರಮದ ವಿವರಗಳನ್ನು ಅನಾವರಣಗೊಳಿಸಿದ ಬಳಿಕ, 2026 ರ ಜುಲೈ 30 ರಿಂದ ಆಗಸ್ಟ್ 1 ರವರೆಗೆ ರಾಜಸ್ಥಾನದ ಜೋಧ್‌ಪುರದಲ್ಲಿ ನಡೆಯಲಿರುವ 'ಅಂತರರಾಷ್ಟ್ರೀಯ ಟೈಪ್ 1 ಮಧುಮೇಹ ಶೃಂಗಸಭೆ 2026' ರಲ್ಲಿ ಸಕಾಲಿಕ ರೋಗನಿರ್ಣಯ, ರಿಯಾಯಿತಿ ದರದಲ್ಲಿ ಇನ್ಸುಲಿನ್ ವಿತರಣೆ, ಕಂಟಿನ್ಯೂಯಸ್ ಗ್ಲುಕೋಸ್ ಮಾನಿಟರಿಂಗ್‌ (CGM) ನಂತಹ ಆಧುನಿಕ ತಂತ್ರಜ್ಞಾನಗಳು, ಮಾನಸಿಕ ಬೆಂಬಲ, ಜೀನ್ ಥೆರಪಿ ಸಂಶೋಧನೆ ಹಾಗೂ ಈ ಆಟೋಇಮ್ಯೂನ್ ರೋಗದಿಂದ ಬಳಲುತ್ತಿರುವವರ ಶ್ರೇಯೋಭಿವೃದ್ಧಿಗಾಗಿ ಜಾಗತಿಕ ಸಹಕಾರ ಮತ್ತು ನೀತಿ ನಿರೂಪಣೆ ಕುರಿತು ಸುದೀರ್ಘವಾಗಿ ಚರ್ಚಿಸಲಾಗುವುದು.

ಆಧುನಿಕ ತಂತ್ರಜ್ಞಾನದ ಬಳಕೆ:

ಕಂಟಿನ್ಯೂಯಸ್ ಗ್ಲುಕೋಸ್ ಮಾನಿಟರಿಂಗ್ (CGM) ಸಾಧನಗಳ ಪ್ರಚಾರ.

ಇನ್ಸುಲಿನ್ ಪಂಪ್‌ಗಳು ಮತ್ತು ಡಿಜಿಟಲ್ ಹೆಲ್ತ್ ಆಪ್‌ಗಳ ಸಕ್ರಿಯ ಬಳಕೆ.

ಮಾನಸಿಕ ಆರೋಗ್ಯ ಮತ್ತು ಜಾಗೃತಿ: ಮಧುಮೇಹದೊಂದಿಗೆ ಜೀವನ ನಡೆಸುತ್ತಿರುವ ಮಕ್ಕಳು ಹಾಗೂ ಯುವಜನತೆಗೆ ಅಗತ್ಯವಿರುವ ಮಾನಸಿಕ ಹಾಗೂ ಸಾಮಾಜಿಕ ಬೆಂಬಲ ವ್ಯವಸ್ಥೆಯನ್ನು ರೂಪಿಸುವುದು.

ಅಂತರರಾಷ್ಟ್ರೀಯ ಸಂಶೋಧನೆ: ರೋಗ ತಡೆಗಟ್ಟುವಿಕೆ ಮತ್ತು ಜೀನ್ ಥೆರಪಿ (Gene Therapy) ಸಂಶೋಧನೆಗಳಲ್ಲಿ ಜಾಗತಿಕ ಮಟ್ಟದ ಸಹಕಾರವನ್ನು ಹೆಚ್ಚಿಸುವುದು.

ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಉಪಯುಕ್ತ ವಿಜ್ಞಾನ ಮತ್ತು ಸಾಮಾನ್ಯ ಜ್ಞಾನದ ಅಂಶಗಳು : 

ಅ) ಆಟೋಇಮ್ಯೂನ್ ರೋಗ (Autoimmune Disease):

ಟೈಪ್ 1 ಮಧುಮೇಹವು ಒಂದು ಆಟೋಇಮ್ಯೂನ್ ಕಾಯಿಲೆಯಾಗಿದೆ.

ಇದರಲ್ಲಿ ದೇಹದ ರೋಗನಿರೋಧಕ ವ್ಯವಸ್ಥೆಯು ಮೇದೋಜೀರಕ ಗ್ರಂಥಿಯ (Pancreas) ಬೀಟಾ ಜೀವಕೋಶಗಳನ್ನು (Beta Cells) ತಪ್ಪಾಗಿ ನಾಶಪಡಿಸುತ್ತದೆ. ಇದರಿಂದಾಗಿ ದೇಹದಲ್ಲಿ ಇನ್ಸುಲಿನ್ ಉತ್ಪಾದನೆ ಸಂಪೂರ್ಣವಾಗಿ ನಿಂತುಹೋಗುತ್ತದೆ.

ಆ) ಟೈಪ್ 1 vs ಟೈಪ್ 2 ವ್ಯತ್ಯಾಸ:

ಟೈಪ್ 1 (Type 1): ಇನ್ಸುಲಿನ್ ಕೊರತೆಯಿಂದ ಉಂಟಾಗುತ್ತದೆ (ಸಾಮಾನ್ಯವಾಗಿ ಬಾಲ್ಯ ಅಥವಾ ಯೌವನದಲ್ಲೇ ಕಂಡುಬರುತ್ತದೆ). ಇದಕ್ಕೆ ಜೀವಮಾನವಿಡೀ ಇನ್ಸುಲಿನ್ ತೆಗೆದುಕೊಳ್ಳುವುದು ಕಡ್ಡಾಯ.

ಟೈಪ್ 2 (Type 2): ಇನ್ಸುಲಿನ್ ಪ್ರತಿರೋಧದಿಂದ (Insulin Resistance) ಬರುತ್ತದೆ. ಇದು ಸಾಮಾನ್ಯವಾಗಿ ಜೀವನಶೈಲಿ ಮತ್ತು ವಯಸ್ಸಿಗೆ ಸಂಬಂಧಿಸಿರುತ್ತದೆ.

ಇ) ಇನ್ಸುಲಿನ್ ಇತಿಹಾಸ:

ಇನ್ಸುಲಿನ್ ಅನ್ನು ವೈದ್ಯಕೀಯವಾಗಿ 1922 ರಲ್ಲಿ ಪ್ರಥಮ ಬಾರಿಗೆ ಬಳಕೆಗೆ ತರಲಾಯಿತು.

ಇದನ್ನು ಫ್ರೆಡೆರಿಕ್ ಬ್ಯಾಂಟಿಂಗ್ (Frederick Banting) ಮತ್ತು ಚಾರ್ಲ್ಸ್ ಬೆಸ್ಟ್ (Charles Best) ಅವರು ಶೋಧಿಸಿದರು.

ಈ) ಎಂಡೋಕ್ರಿನಾಲಜಿ (Endocrinology):

ದೇಹದ ಹಾರ್ಮೋನ್‌ಗಳು ಮತ್ತು ನಾಳರಹಿತ ಗ್ರಂಥಿಗಳ (Endocrine Glands - ಮೇದೋಜೀರಕ ಗ್ರಂಥಿ ಸೇರಿದಂತೆ) ಬಗ್ಗೆ ಅಧ್ಯಯನ ಮಾಡುವ ವೈದ್ಯಕೀಯ ಶಾಖೆಗೆ ಎಂಡೋಕ್ರಿನಾಲಜಿ ಎಂದು ಕರೆಯಲಾಗುತ್ತದೆ.

-----------------------------------------

ಉನ್ನತ ಶಿಕ್ಷಣ ಇಲಾಖೆಯ ಕಾರ್ಯದರ್ಶಿಯಾಗಿ 'ನರೇಶ್ ಪಾಲ್ ಗಂಗ್ವಾರ್' ನೇಮಕ

ಕೇಂದ್ರ ಸರ್ಕಾರದ ಸಚಿವ ಸಂಪುಟದ ನೇಮಕಾತಿ ಸಮಿತಿಯು (ACC) ಹಿರಿಯ ಆಡಳಿತಾತ್ಮಕ ಬದಲಾವಣೆಯ ಭಾಗವಾಗಿ ನಡೆಸಿದ 13 ಇಲಾಖೆಗಳ ವರ್ಗಾವಣೆಯಡಿ, B.Tech, IIT ದೆಹಲಿಯಿಂದ M.Tech ಹಾಗೂ ಅರ್ಥಶಾಸ್ತ್ರದಲ್ಲಿ M.A ಪದವಿ ಹೊಂದಿದ್ದು, ಈ ಹಿಂದೆ ಪಶುಸಂಗೋಪನೆ ಮತ್ತು ಕ್ಷೀರ ಅಭಿವೃದ್ಧಿ ಇಲಾಖೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದ 1994 ರ ರಾಜಸ್ಥಾನ ಕೆಡರ್‌ನ IAS ಅಧಿಕಾರಿ ನರೇಶ್ ಪಾಲ್ ಗಂಗ್ವಾರ್ ಅವರನ್ನು ಶಿಕ್ಷಣ ಸಚಿವಾಲಯದ ಉನ್ನತ ಶಿಕ್ಷಣ ಇಲಾಖೆಯ ನೂತನ ಕಾರ್ಯದರ್ಶಿಯಾಗಿ ನೇಮಕಗೊಳಿಸಲಾಗಿದ್ದು, ಇವರು ಪಂಚಾಯತ್ ರಾಜ್ ಇಲಾಖೆಗೆ ವರ್ಗಾವಣೆಯಾದ ವಿನೀತ್ ಜೋಶಿ ಅವರ ಸ್ಥಾನವನ್ನು ಅಲಂಕರಿಸಲಿದ್ದಾರೆ.

--------------------------------------

ಪರೀಕ್ಷಾ ಅಕ್ರಮ ತಡೆಗೆ ಕಠಿಣ ತಿದ್ದುಪಡಿ ಮಸೂದೆ

NEET, UGC-NET ನಂತಹ ಪರೀಕ್ಷಾ ಅಕ್ರಮಗಳ ನಿಯಂತ್ರಣಕ್ಕಾಗಿ ಕೇಂದ್ರ ಸರ್ಕಾರವು 2024ರ ಕಾಯ್ದೆಗೆ ಕಠಿಣ ತಿದ್ದುಪಡಿ ತಂದಿದ್ದು, ಪಶ್ನೆಪತ್ರಿಕೆ ಸೋರಿಕೆ, OMR ಶೀಟ್ ತಿದ್ದುಪಡಿ, ನಕಲಿ ಜಾಲತಾಣ/ಅಡ್ಮಿಟ್ ಕಾರ್ಡ್ ಸೃಷ್ಟಿ, ಆಳ್ವಿಕೆ (ಆಳುಪಿಕೆ) ಹಾಗೂ ಸಂಘಟಿತ ಜಾಲದಂತಹ ಅಪರಾಧಗಳಿಗೆ 5 ರಿಂದ 10 ವರ್ಷಗಳ ಜೈಲು ಶಿಕ್ಷೆ, ₹10 ಕೋಟಿಯವರೆಗೆ ದಂಡ, ಆಸ್ತಿ ಮುಟ್ಟುಗೋಲು ಜೊತೆಗೆ ವಿಶೇಷ ತನಿಖಾ ತಂಡ ಮತ್ತು ಫಾಸ್ಟ್ ಟ್ರ್ಯಾಕ್ ನ್ಯಾಯಾಲಯಗಳ ಮೂಲಕ ಶೀಘ್ರ ನ್ಯಾಯದಾನಕ್ಕೆ ಅವಕಾಶ ಕಲ್ಪಿಸಿದೆ.

------------------------------------

NEET-UG 2026 ಪ್ರಶ್ನೆಪತ್ರಿಕೆ ಸೋರಿಕೆ ಮತ್ತು ಶಿಕ್ಷಣ ಸಚಿವರ ರಾಜೀನಾಮೆ

ಮೇ 3, 2026 ರಂದು ನಡೆದ NEET-UG ಪರೀಕ್ಷೆಯಲ್ಲಾದ ಅಕ್ರಮಗಳು ಹಾಗೂ ಪ್ರಶ್ನೆಪತ್ರಿಕೆ ಸೋರಿಕೆ (Paper Leak) ಪ್ರಕರಣಕ್ಕೆ ಸಂಬಂಧಿಸಿದಂತೆ ಲಕ್ಷಾಂತರ ಅಭ್ಯರ್ಥಿಗಳ ಭವಿಷ್ಯದ ಹಿತದೃಷ್ಟಿ ಮತ್ತು ದೇಶಾದ್ಯಂತ ವಿದ್ಯಾರ್ಥಿಗಳು ನಡೆಸಿದ ಜಂತರ್ ಮಂತರ್ ಬೃಹತ್ ಪ್ರತಿಭಟನೆಯ ಬಿಸಿಗೆ ಸ್ಪಂದಿಸಿ, ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರು ತಮ್ಮ ಹುದ್ದೆಗೆ ಹಠಾತ್ ರಾಜೀನಾಮೆ ನೀಡಿದ್ದು, ಸಮಗ್ರ ಹೊಣೆಗಾರಿಕೆ ವಹಿಸಿಕೊಂಡು ಪ್ರಧಾನಿ ನರೇಂದ್ರ ಮೋದಿ ಅವರಿಗೆ ರಾಜೀನಾಮೆ ಪತ್ರ ರವಾನಿಸಿದ್ದಾರೆ.

________________________________________________________________________________

ಅಂತಾರಾಷ್ಟ್ರೀಯ ಸುದ್ದಿಗಳು :

ಅಂತರರಾಷ್ಟ್ರೀಯ ಕ್ರಿಕೆಟ್‌ನಲ್ಲಿ ವೈಭವ್ ಸೂರ್ಯವಂಶಿ ಅವರ ಐತಿಹಾಸಿಕ ಅರ್ಧಶತಕದ ದಾಖಲೆ

ಜಿಂಬಾಬ್ವೆ ವಿರುದ್ಧ ಹರಾರೆಯಲ್ಲಿ ನಡೆದ ಪ್ರಥಮ ಟಿ20 ಪಂದ್ಯದಲ್ಲಿ ಭಾರತದ 15 ವರ್ಷ 118 ದಿನಗಳ ಉದಯೋನ್ಮುಖ ಬ್ಯಾಟರ್ ವೈಭವ್ ಸೂರ್ಯವಂಶಿ ಅವರು 126 ರನ್‌ಗಳ ಗುರಿ ಬೆನ್ನಟ್ಟುವಾಗ ಕೇವಲ 18 ಎಸೆತಗಳಲ್ಲಿ 4 ಬೌಂಡರಿ ಹಾಗೂ 4 ಸಿಕ್ಸರ್‌ಗಳ ನೆರವಿನಿಂದ 50 ರನ್ ಪೂರೈಸಿ, ಜಿಬ್ರಾಲ್ಟರ್‌ನ ಲೂಯಿಸ್ ಬ್ರೂಸ್ (16 ವರ್ಷ 56 ದಿನ) ಹಾಗೂ ಸಚಿನ್ ತೆಂಡೂಲ್ಕರ್ ಅವರ 37 ವರ್ಷಗಳಷ್ಟು ಹಳೆಯ ದಾಖಲೆಯನ್ನು ಮುರಿಯುವ ಮೂಲಕ ಪುರುಷರ ಅಂತರರಾಷ್ಟ್ರೀಯ ಕ್ರಿಕೆಟ್ ಇತಿಹಾಸದಲ್ಲೇ ಅರ್ಧಶತಕ ಗಳಿಸಿದ ಅತಿ ಕಿರಿಯ ಆಟಗಾರ ಎಂಬ ವಿಶ್ವದಾಖಲೆಯನ್ನು ಬರೆದಿದ್ದಾರೆ.

------------------------------------

ಕೀನ್ಯಾದಲ್ಲಿ ಸಾಂಕ್ರಾಮಿಕ ರೋಗ ನಿಯಂತ್ರಣಕ್ಕೆ ಭಾರತದಿಂದ 4.5 ಟನ್ ವೈದ್ಯಕೀಯ ಸಹಾಯ

ಎಬೋಲಾ ವೈರಸ್ ಜೊತೆಗೆ ಇತರ ಮಾರಕ ಸಾಂಕ್ರಾಮಿಕ ರೋಗಗಳ ಹರಡುವಿಕೆಯನ್ನು ಪರಿಣಾಮಕಾರಿಯಾಗಿ ತಡೆಗಟ್ಟಲು ಮತ್ತು ಅಲ್ಲಿನ ಮುನ್ನೆಚ್ಚರಿಕಾ ಆರೋಗ್ಯ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸುವ ಉದಾತ್ತ ಉದ್ದೇಶದಿಂದ ಭಾರತ ಸರ್ಕಾರವು ತುರ್ತಾಗಿ ರವಾನಿಸಿದ್ದ 4.5 ಟನ್ ತೂಕದ ಅತ್ಯಗತ್ಯ ವೈದ್ಯಕೀಯ ಸಾಮಗ್ರಿಗಳ ಮೊದಲ ಕಂತಿನ ನೆರವನ್ನು, ಕೀನ್ಯಾದಲ್ಲಿ ಸೇವೆ ಸಲ್ಲಿಸುತ್ತಿರುವ ಭಾರತದ ಹೈಕಮಿಷನರ್ ಆದರ್ಶ್ ಸ್ವೈಕಾ ಅವರು ಜುಲೈ 22, 2026 ರಂದು ರಾಜಧಾನಿ ನೈರೋಬಿಯ ಪ್ರಸಿದ್ಧ ಜೊಮೊ ಕೆನ್ಯಾಟ್ಟಾ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ನಡೆದ ಅಧಿಕೃತ ಕಾರ್ಯಕ್ರಮದಲ್ಲಿ ಕೀನ್ಯಾದ ಆರೋಗ್ಯ ಸಂಪುಟ ಕಾರ್ಯದರ್ಶಿ ಆಡೆನ್ ದುವಾಲೆ ಅವರಿಗೆ ಅತ್ಯಂತ ಯಶಸ್ವಿಯಾಗಿ ಹಸ್ತಾಂತರಿಸಿದರು.

________________________________________________________________________________

23 & 24 Current Affairs ಪ್ರಚಲಿತ ವಿದ್ಯಮಾನಗಳು

 

ರಾಜ್ಯ ಸುದ್ದಿಗಳು :

ಮೊಬೈಲ್ ಸ್ವಾಧೀನ: ಶೇ. 50ರ ಗಡಿ ದಾಟಿದ ರಾಜ್ಯದ ಜಪ್ತಿ ಸಾಧನೆ

ಕೇಂದ್ರ ಸರ್ಕಾರದ 'ಸಿಇಐಆರ್' (CEIR) ಪೋರ್ಟಲ್ ಬಳಸಿಕೊಂಡು ಕಳುವಾದ ಮತ್ತು ಕಳೆದುಹೋದ ಮೊಬೈಲ್ ಫೋನ್‌ಗಳನ್ನು ಪತ್ತೆಹಚ್ಚಿ ವಶಪಡಿಸಿಕೊಳ್ಳುವಲ್ಲಿ ಮಹಾರಾಷ್ಟ್ರವು ಶೇ. 53ರಷ್ಟು ಪ್ರಗತಿಯೊಂದಿಗೆ ದೇಶದಲ್ಲೇ ಮೊದಲ ಸ್ಥಾನದಲ್ಲಿದ್ದರೆ, ಕರ್ನಾಟಕವು ಶೇ. 47.18ರಷ್ಟು ಜಪ್ತಿ ಪ್ರಮಾಣದೊಂದಿಗೆ ಎರಡನೇ ಸ್ಥಾನ ಕಾಯ್ದುಕೊಂಡಿದೆ ಮತ್ತು ಹಿಂದೆ ಅಗ್ರಸ್ಥಾನದಲ್ಲಿದ್ದ ತೆಲಂಗಾಣವು ನಾಲ್ಕನೇ ಸ್ಥಾನಕ್ಕೆ ಕುಸಿದಿದೆ.

------------------------------

ಕರ್ನಾಟಕದ ಮಹದಾಯಿ ಹಾಗೂ ಕಾವೇರಿ ವಿಷಯದಲ್ಲಿ ಮಹತ್ವದ ಬೆಳವಣಿಗೆ

ಸುಪ್ರೀಂ ಕೋರ್ಟ್‌ನಲ್ಲಿ ಕಾನೂನು ವಿವಾದ ಬಗೆಹರಿಯದ ಹೊರತು ಕಳಸಾ-ಬಂಡೂರಿ ಸೇರಿದಂತೆ ಮಹದಾಯಿ ಕುಡಿಯುವ ನೀರಿನ ಯೋಜನೆಗೆ ಅರಣ್ಯ ಮತ್ತು ಪರಿಸರ ಅನುಮತಿ ನೀಡಲು ಸಾಧ್ಯವಿಲ್ಲವೆಂದು ಸ್ಪಷ್ಟಪಡಿಸಿರುವ ಕೇಂದ್ರ ಸರ್ಕಾರವು ಕರ್ನಾಟಕ ಸಲ್ಲಿಸಿದ್ದ ಪ್ರಸ್ತಾವನೆಯನ್ನು ವಾಪಸ್ ಕಳುಹಿಸುವ ಮೂಲಕ ರಾಜ್ಯಕ್ಕೆ ಭಾರಿ ಹಿನ್ನಡೆ ಉಂಟುಮಾಡಿದೆ; ಮತ್ತೊಂದೆಡೆ ಕಾವೇರಿ ಜಲಾನಯನ ಪ್ರದೇಶದಲ್ಲಿ ಮಳೆ ಕೊರತೆ ಎದುರಾಗಿರುವುದರಿಂದ ಜಲಾಶಯಗಳಲ್ಲಿ ಲಭ್ಯವಿರುವ ನೀರನ್ನು ಕೇವಲ ಕುಡಿಯುವ ಉದ್ದೇಶಕ್ಕೆ ಮಾತ್ರ ಬಳಸಬೇಕು ಮತ್ತು ತಮಿಳುನಾಡಿಗೆ ತಕ್ಷಣಕ್ಕೆ ನೀರು ಹರಿಸುವ ಅಗತ್ಯವಿಲ್ಲ ಎಂದು ಕಾವೇರಿ ನೀರು ನಿರ್ವಹಣಾ ಪ್ರಾಧಿಕಾರ (CWMA) ಆದೇಶಿಸಿರುವುದು ರಾಜ್ಯಕ್ಕೆ ತಾತ್ಕಾಲಿಕ ಸಮಾಧಾನ ತಂದಿದೆ.

________________________________________________________________________________

ರಾಷ್ಟ್ರೀಯ ಸುದ್ದಿಗಳು :

ನೀತಿ ಆಯೋಗದ ನೂತನ ಸಿಇಒ ಆಗಿ ಅನುರಾಗ್ ಜೈನ್ ನೇಮಕ

ಪೂರ್ವಭಾವಿಯಾಗಿ ನೀತಿ ಆಯೋಗದ ಸಿಇಒ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಬಿ.ವಿ.ಆರ್. ಸುಬ್ರಹ್ಮಣ್ಯಂ ಅವರ ಸೇವಾ ಅವಧಿಯು ಮುಕ್ತಾಯಗೊಂಡ ಕಾರಣ, ಸಾರ್ವಜನಿಕ ಆಡಳಿತ, ಮೂಲಸೌಕರ್ಯ ಅಭಿವೃದ್ಧಿ, ಕೈಗಾರಿಕಾ ನೀತಿ ರಚನೆ ಮತ್ತು ವಿವಿಧ ಪ್ರಮುಖ ಆಡಳಿತಾತ್ಮಕ ಸುಧಾರಣೆಗಳಲ್ಲಿ ಸುಮಾರು ನಾಲ್ಕು ದಶಕಗಳ ಅಗಾಧ ಅನುಭವ ಹೊಂದಿದ್ದು ಹಾಗೂ ಈ ಹಿಂದೆ ಮಧ್ಯಪ್ರದೇಶದ ಮುಖ್ಯ ಕಾರ್ಯದರ್ಶಿಯಾಗಿ ಯಶಸ್ವಿಯಾಗಿ ಸೇವೆ ಸಲ್ಲಿಸಿರುವ 1989ರ ಬ್ಯಾಚ್‌ನ ಹಿರಿಯ ಐಎಎಸ್ ಅಧಿಕಾರಿ ಅನುರಾಗ್ ಜೈನ್ ಅವರನ್ನು ಕೇಂದ್ರ ಸರ್ಕಾರವು ಮುಂದಿನ ಎರಡು ವರ್ಷಗಳ ಅವಧಿಗೆ ನೀತಿ ಆಯೋಗದ ಹೊಸ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಯಾಗಿ (ಸಿಇಒ) ನೇಮಕ ಮಾಡಿ ಆದೇಶಿಸಿದೆ.

----------------------------------

ಬಹುರಾಷ್ಟ್ರೀಯ ನೌಕಾ ಸಮರಾಭ್ಯಾಸ:

 'ಆಪರೇಷನ್ ಸದರ್ನ್ ರೆಡಿನೆಸ್ 26-2'

ಭಾರತೀಯ ನೌಕಾಪಡೆಯ ನೇತೃತ್ವದಲ್ಲಿ ಕಂಬೈನ್ಡ್ ಮ್ಯಾರಿಟೈಮ್ ಫೋರ್ಸಸ್ (CMF) ಸಹಯೋಗದೊಂದಿಗೆ ಕೇರಳದ ಕೊಚ್ಚಿಯ ದಕ್ಷಿಣ ನೌಕಾಪಡೆ ಕಮಾಂಡ್‌ನಲ್ಲಿ ಮೊದಲ ಬಾರಿಗೆ ನಡೆದ 'ಆಪರೇಷನ್ ಸದರ್ನ್ ರೆಡಿನೆಸ್ 26-2' ನಾಲ್ಕು ದಿನಗಳ ಬಹುರಾಷ್ಟ್ರೀಯ ತರಬೇತಿ ಸಮರಾಭ್ಯಾಸವಾಗಿದ್ದು, ಇದು ಕೆಂಪು ಸಮುದ್ರ ಮತ್ತು ಪಶ್ಚಿಮ ಹಿಂದೂ ಮಹಾಸಾಗರದಲ್ಲಿ ಎದುರಾಗುವ ಬೆದರಿಕೆಗಳನ್ನು ಜಂಟಿಯಾಗಿ ಎದುರಿಸಲು ಹಾಗೂ ಅತ್ಯಾಧುನಿಕ ಸಿಮ್ಯುಲೇಟರ್ ತಂತ್ರಜ್ಞಾನಗಳ ಮೂಲಕ ನಾವಿಗೇಷನ್ ಮತ್ತು ಬೆಂಕಿ ನಂದಿಸುವಿಕೆಯಂತಹ ತಾಂತ್ರಿಕ ಸಾಮರ್ಥ್ಯಗಳನ್ನು ಹೆಚ್ಚಿಸಿ ಪ್ರಾದೇಶಿಕ ಭದ್ರತೆಯನ್ನು ಗಟ್ಟಿಗೊಳಿಸುವ ಉದ್ದೇಶವನ್ನು ಹೊಂದಿದೆ.

-----------------------------------

ರಾಷ್ಟ್ರೀಯ ಪ್ರಸಾರ ದಿನ ಜುಲೈ 23

ರೇಡಿಯೋ ಇತಿಹಾಸದಿಂದ ಆಧುನಿಕ ಡಿಜಿಟಲ್ ಯುಗದವರೆಗಿನ ಧ್ವನಿ ಪಯಣ

ಭಾರತದಲ್ಲಿ ಪ್ರಥಮ ಬಾರಿಗೆ 1927ರ ಜುಲೈ 23ರಂದು ಮುಂಬೈನ 'ಇಂಡಿಯನ್ ಬ್ರಾಡ್‌ಕಾಸ್ಟಿಂಗ್ ಕಂಪನಿ'ಯ ಮೂಲಕವೇ ಮೊದಲ ಅಧಿಕೃತ ಖಾಸಗಿ ರೇಡಿಯೋ ಪ್ರಸಾರ ಸೇವೆ ಶುರುವಾದ ಐತಿಹಾಸಿಕ ಸವಿನೆನಪಿಗಾಗಿ ಪ್ರತಿ ವರ್ಷ ಈ ದಿನವನ್ನು 'ರಾಷ್ಟ್ರೀಯ ಪ್ರಸಾರ ದಿನ'ವನ್ನಾಗಿ ದೇಶಾದ್ಯಂತ ಆಚರಿಸಲಾಗುತ್ತಿದ್ದು, ಇದು ಆರಂಭಿಕ ಕಾಲದ ಮರದ ರೇಡಿಯೋ ಪೆಟ್ಟಿಗೆಯಿಂದ ಹಿಡಿದು ಇಂದಿನ ಸ್ಮಾರ್ಟ್‌ಫೋನ್ ಕೈಯಲ್ಲಿರುವ ಎಫ್‌ಎಂ, ಪಾಡ್‌ಕಾಸ್ಟ್‌ಗಳು ಹಾಗೂ ಆಧುನಿಕ ಡಿಜಿಟಲ್ ಆಡಿಯೋ ಸ್ಟ್ರೀಮಿಂಗ್‌ವರೆಗೂ ಭಾರತೀಯ ಪ್ರಸಾರ ಕ್ಷೇತ್ರವು ಸಾಧಿಸಿರುವ ಅಪಾರ ಮಹತ್ವದ ತಾಂತ್ರಿಕ ಪ್ರಗತಿ, ಮಾಹಿತಿ ಜಾಗೃತಿ ಮತ್ತು ಸಂವಹನದ ಸುದೀರ್ಘ ಕ್ರಾಂತಿಕಾರಿ ಪಯಣವನ್ನು ಕೃತಜ್ಞತೆಯಿಂದ ಸ್ಮರಿಸುವ ವಿಶೇಷ ಸಂದರ್ಭವಾಗಿದೆ.

--------------------------------------

ಲೋಕಮಾನ್ಯ ಬಾಲಗಂಗಾಧರ ತಿಲಕ್ ಜಯಂತಿ ಜುಲೈ 23

ಸ್ವದೇಶಿ ಚಳವಳಿಯ ಪ್ರವರ್ತಕ ಹಾಗೂ ಜಯಂತಿ ವಿಶೇಷ

ಪ್ರತಿವರ್ಷ ಜುಲೈ 23 ರಂದು ಜಯಂತಿಯನ್ನು ಆಚರಿಸಲಾಗುವ ಲೋಕಮಾನ್ಯ ಬಾಲಗಂಗಾಧರ ತಿಲಕ್ ಅವರು 'ಸ್ವರಾಜ್ಯ ನನ್ನ ಜನ್ಮಸಿದ್ಧ ಹಕ್ಕು, ಅದನ್ನು ನಾನು ಪಡೆದೇ ತೀರುತ್ತೇನೆ' ಎಂಬ ಕ್ರಾಂತಿಕಾರಿ ಸಿಂಹಗರ್ಜನೆಯೊಂದಿಗೆ ಭಾರತದ ಸ್ವಾತಂತ್ರ್ಯ ಚಳವಳಿಗೆ ಅಭೂತಪೂರ್ವ ಚೈತನ್ಯ ತುಂಬಿದ್ದು, 'ಕೇಸರಿ' ಮತ್ತು 'ಮರಾಠ' ಪತ್ರಿಕೆಗಳು, ಗೀತಾ ರಹಸ್ಯ ಗ್ರಂಥ, ಡೆಕ್ಕನ್ ಎಜುಕೇಶನ್ ಸೊಸೈಟಿ ಸಂಸ್ಥೆ ಹಾಗೂ ಸಾರ್ವಜನಿಕ ಗಣೇಶೋತ್ಸವ ಮತ್ತು ಶಿವಾಜಿ ಜಯಂತಿ ಉತ್ಸವಗಳ ಮೂಲಕ ಜನಸಾಮಾನ್ಯರನ್ನು ಒಗ್ಗೂಡಿಸಿ ಸಂಘಟಿಸಿದ್ದಲ್ಲದೆ, ಲಾಲ್-ಬಾಲ್-ಪಾಲ್ ತ್ರಿವಳಿ ನಾಯಕತ್ವ ಮತ್ತು 1916 ರ ಹೋಮ್ ರೂಲ್ ಆಂದೋಲನದ ಮೂಲಕ ಬ್ರಿಟಿಷ್ ಆಡಳಿತದ ವಿರುದ್ಧ ಸ್ವಯಂ ಆಡಳಿತಕ್ಕಾಗಿ ರಾಷ್ಟ್ರೀಯ ಜಾಗೃತಿಯನ್ನು ಮೂಡಿಸಿದ ಭಾರತದ ಕ್ರಾಂತಿಕಾರಿ ಜನನಾಯಕರಾಗಿದ್ದಾರೆ.

________________________________________________________________________________

ಅಂತಾರಾಷ್ಟ್ರೀಯ ಸುದ್ದಿಗಳು :

ಅಮೆರಿಕ F-1 ವಿದ್ಯಾರ್ಥಿ ವೀಸಾ ನಿಯಮಾವಳಿ ತಿದ್ದುಪಡಿ: ಭಾರತೀಯರಿಗೆ ಸವಾಲು

ಅಮೆರಿಕದಲ್ಲಿ ಉನ್ನತ ಮಟ್ಟದ ಶಿಕ್ಷಣವನ್ನು ಪೂರೈಸಿ ಅಲ್ಲಿಯೇ ಉತ್ತಮ ಉದ್ಯೋಗಾವಕಾಶಗಳನ್ನು ಗಿಟ್ಟಿಸಿಕೊಳ್ಳುವ ದೊಡ್ಡ ಕನಸನ್ನು ಹೊಂದಿರುವ ಲಕ್ಷಾಂತರ ಭಾರತೀಯ ವಿದ್ಯಾರ್ಥಿಗಳ ಹಿತಾಸಕ್ತಿಗೆ ಹಿನ್ನಡೆಯಾಗುವಂತೆ, ಅಮೆರಿಕದ ಒಳನಾಡಿನ ಭದ್ರತಾ ಇಲಾಖೆಯು ದಶಕಗಳ ಕಾಲ ಜಾರಿಯಲ್ಲಿದ್ದ 'ಡ್ಯೂರೇಷನ್ ಆಫ್ ಸ್ಟೇಟಸ್' ವ್ಯವಸ್ಥೆಯನ್ನು ಸಂಪೂರ್ಣವಾಗಿ ರದ್ದುಗೊಳಿಸಿ ಎಫ್-1 ವೀಸಾ ನೀತಿಯಲ್ಲಿ ಮಹತ್ವದ ತಿದ್ದುಪಡಿ ತಂದಿದ್ದು, ವಿದ್ಯಾರ್ಥಿಗಳು ತಮ್ಮ ಅಧ್ಯಯನ ಪೂರ್ಣಗೊಳ್ಳುವವರೆಗೆ ಕಾನೂನುಬದ್ಧವಾಗಿ ದೇಶದಲ್ಲಿಯೇ ಇರಲು ನೀಡುವ ಕಾಲಾವಕಾಶದ ಬದಲು, ಅವರ ಒಟ್ಟು ಗರಿಷ್ಠ ವಾಸ್ತವ್ಯದ ಅವಧಿಯನ್ನು ಕೇವಲ 4 ವರ್ಷಗಳಿಗೆ ಸೀಮಿತಗೊಳಿಸಿ ಕಡ್ಡಾಯ ಕಾನೂನನ್ನು ಜಾರಿಗೆ ತಂದಿದೆ.

------------------------------------

________________________________________________________________________________

https://link.amazon/B094PHpS8

https://link.amazon/B0gNcGmEO

21 & 22 Current Affairs ಪ್ರಚಲಿತ ವಿದ್ಯಮಾನಗಳು

 

ರಾಜ್ಯ ಸುದ್ದಿಗಳು :

'MIST' – ಬೆಂಗಳೂರಿನ ಹೊಸ ತಂತ್ರಜ್ಞಾನ ಮತ್ತು ನವೋದ್ಯಮ ಮ್ಯೂಸಿಯಂ

ಭಾರತದ ತಂತ್ರಜ್ಞಾನ ಹಾಗೂ ಸ್ಟಾರ್ಟ್‌ಅಪ್‌ಗಳ ರಾಜಧಾನಿಯಾದ ಬೆಂಗಳೂರಿನ ನಾವೀನ್ಯತೆಯ ಸುದೀರ್ಘ ಪಯಣವನ್ನು ಕಣ್ಣಿಗೆ ಕಟ್ಟುವಂತೆ ಬಿಂಬಿಸಲು, ವಿಶ್ವಪ್ರಸಿದ್ಧ ಈಜಿಪ್ಟ್‌ನ 'ಗ್ರ್ಯಾಂಡ್ ಈಜಿಪ್ಟಿಯನ್ ಮ್ಯೂಸಿಯಂ' ವಿನ್ಯಾಸಗೊಳಿಸಿದ ಐರ್ಲೆಂಡ್‌ ಮೂಲದ ಹೆನೆಗಾನ್ ಪೆಂಗ್ ಆರ್ಕಿಟೆಕ್ಟ್ಸ್ ಸಂಸ್ಥೆಯ ವಾಸ್ತುಶಿಲ್ಪ ವಿನ್ಯಾಸದೊಂದಿಗೆ ಬೈಯಪ್ಪನಹಳ್ಳಿಯ ಎನ್‌ಜಿಇಎಫ್ (NGEF) ಆವರಣದಲ್ಲಿ ವಿಶ್ವದರ್ಜೆಯ 'ಮ್ಯೂಸಿಯಂ ಆಫ್ ಇನ್ನೋವೇಷನ್, ಸ್ಟಾರ್ಟ್‌ಅಪ್ & ಟೆಕ್ನಾಲಜಿ' (MIST) ಎಂಬ ನೂತನ ಸಂಗ್ರಹಾಲಯವನ್ನು ಸಾರ್ವಜನಿಕ-ಖಾಸಗಿ ಸಹಭಾಗಿತ್ವದಲ್ಲಿ (PPP) ಸ್ಥಾಪಿಸಲು ಯೋಜನೆ ರೂಪಿಸಲಾಗಿದೆ.

------------------------------

ಬೆಂಗಳೂರು ದಕ್ಷಿಣ ಶೈಕ್ಷಣಿಕ ಜಿಲ್ಲೆಯ ಹೆಸರು "ಬೆಂಗಳೂರು ಕೇಂದ್ರ ಶೈಕ್ಷಣಿಕ ಜಿಲ್ಲೆ" ಎಂದು ಪುನರ್ನಾಮಕರಣ

​ರಾಮನಗರ ಜಿಲ್ಲೆಯನ್ನು 'ಬೆಂಗಳೂರು ದಕ್ಷಿಣ' ಎಂದು ಮರುನಾಮಕರಣ ಮಾಡಿದ್ದರಿಂದ ಶಾಲಾ ಶಿಕ್ಷಣ ಇಲಾಖೆಯ 'ಬೆಂಗಳೂರು ದಕ್ಷಿಣ ಶೈಕ್ಷಣಿಕ ಜಿಲ್ಲೆ'ಯ ಹೆಸರಿನೊಂದಿಗೆ ಸಾರ್ವಜನಿಕ ವ್ಯವಹಾರಗಳು, ಆಡಳಿತಾತ್ಮಕ ಪತ್ರವ್ಯವಹಾರ, ಅಧಿಸೂಚನೆಗಳು ಹಾಗೂ ತಂತ್ರಾಂಶ ದತ್ತಾಂಶ (Data) ನಿರ್ವಹಣೆಯಲ್ಲಿ ಉಂಟಾಗುತ್ತಿದ್ದ ಗೊಂದಲಗಳನ್ನು ಪರಿಹರಿಸಿ ಕಾರ್ಯನಿರ್ವಹಣೆಯಲ್ಲಿ ಸ್ಪಷ್ಟತೆ ತರಲು, ಶಿಕ್ಷಣ ಇಲಾಖೆಯು ತನ್ನ 'ಬೆಂಗಳೂರು ದಕ್ಷಿಣ ಶೈಕ್ಷಣಿಕ ಜಿಲ್ಲೆ'ಯನ್ನು ಇನ್ಮುಂದೆ 'ಬೆಂಗಳೂರು ಕೇಂದ್ರ ಶೈಕ್ಷಣಿಕ ಜಿಲ್ಲೆ' ಎಂದು ಅಧಿಕೃತವಾಗಿ ಹೆಸರು ಬದಲಾಯಿಸಿ ಆದೇಶಿಸಿದೆ.

________________________________________________________________________________

ರಾಷ್ಟ್ರೀಯ ಸುದ್ದಿಗಳು :

1947 ರ ಜುಲೈ 22 ಭಾರತದ ರಾಷ್ಟ್ರಧ್ವಜ ಅಂಗೀಕಾರ ದಿನ: ಐತಿಹಾಸಿಕ ಹಿನ್ನೆಲೆ

ಆಂಧ್ರಪ್ರದೇಶದ ಸ್ವಾತಂತ್ರ್ಯ ಹೋರಾಟಗಾರ ಪಿಂಗಳಿ ವೆಂಕಯ್ಯನವರು 1921 ರಲ್ಲಿ ರೂಪಿಸಿದ ಮೂಲ ವಿನ್ಯಾಸಕ್ಕೆ ಮಹಾತ್ಮ ಗಾಂಧೀಜಿಯವರ ಸಲಹೆಯಂತೆ ಶಾಂತಿ ಹಾಗೂ ಪ್ರಗತಿಯ ಸಂಕೇತವಾಗಿ ಬಿಳಿ ಬಣ್ಣ ಮತ್ತು ಚರಕವನ್ನು ಸೇರಿಸಿ, ನಂತರ 1931 ರ ಕರಾಚಿ ಕಾಂಗ್ರೆಸ್ ಅಧಿವೇಶನದಲ್ಲಿ 'ಸ್ವರಾಜ್ ಧ್ವಜ'ವಾಗಿ ಅಂಗೀಕರಿಸಲ್ಪಟ್ಟ ತ್ರಿವರ್ಣ ಧ್ವಜವನ್ನು 1947 ರ ಜುಲೈ 22 ರಂದು ಭಾರತೀಯ ಸಂವಿಧಾನ ಸಭೆಯು ದೇಶದ ಅಧಿಕೃತ 'ರಾಷ್ಟ್ರಧ್ವಜ'ವಾಗಿ ಸ್ವೀಕರಿಸಿದ್ದರಿಂದ, ಈ ಮಹತ್ವದ ಚಾರಿತ್ರಿಕ ಘಟನೆಯ ಸವಿನೆನಪಿಗಾಗಿ ಪ್ರತಿ ವರ್ಷ ಜುಲೈ 22 ರಂದು ಭಾರತದಾದ್ಯಂತ 'ರಾಷ್ಟ್ರೀಯ ಧ್ವಜ ಸ್ವೀಕಾರ ದಿನ'ವನ್ನು ಅತ್ಯಂತ ದೇಶಭಕ್ತಿ ಹಾಗೂ ಗೌರವದಿಂದ ಆಚರಿಸಲಾಗುತ್ತದೆ.

------------------------------------

'ರಾಜಮಾರ್ಗಯಾತ್ರ' ಆಪ್‌ಗೆ NHAI ತಂದಿರುವ ನೂತನ ಡಿಜಿಟಲ್ ಸೇವೆಗಳು

ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು (NHAI) ತನ್ನ 'ರಾಜಮಾರ್ಗಯಾತ್ರ' ಮೊಬೈಲ್ ಆಪ್ ಮೂಲಕ ಪ್ರಯಾಣಿಕರ ಅನುಕೂಲಕ್ಕಾಗಿ ಡಿಜಿಲಾಕರ್, ವಾಹನ್ ಪೋರ್ಟಲ್ ಹಾಗೂ GIS ತಂತ್ರಜ್ಞಾನಗಳನ್ನು ಸಂಯೋಜಿಸಿ, ಟೋಲ್ ಪ್ಲಾಜಾದಿಂದ 20 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ವಾಸಿಸುವ ಸ್ಥಳೀಯ ನಿವಾಸಿಗಳಿಗೆ ದೆಹಲಿಯ 'ಮುಂಡ್ಕಾ-ಬಕ್ಕರ್‌ವಾಲಾ' ಟೋಲ್ ಪ್ಲಾಜಾದಿಂದ ಪ್ರಥಮವಾಗಿ ಆರಂಭಿಸಿರುವ 'ಡಿಜಿಟಲ್ ಲೋಕಲ್ ಟೋಲ್ ಪಾಸ್' ಸೌಲಭ್ಯ ಹಾಗೂ ಕನ್ನಡ ಸೇರಿದಂತೆ ಒಟ್ಟು 22 ಪ್ರಮುಖ ಭಾರತೀಯ ಭಾಷೆಗಳಲ್ಲಿ ಸಾರ್ವಜನಿಕರಿಗೆ ಮಾರ್ಗದರ್ಶನ ಮತ್ತು ತಕ್ಷಣದ ನೆರವು ಒದಗಿಸುವ 'ಮಾರ್ಗಮಿತ್ರ' ಡಿಜಿಟಲ್ ಸಹಾಯ ಕೇಂದ್ರ ಎಂಬ ಎರಡು ಪ್ರಮುಖ ಕ್ರಾಂತಿಕಾರಿ ಸೇವೆಗಳನ್ನು ಯಶಸ್ವಿಯಾಗಿ ಬಿಡುಗಡೆಗೊಳಿಸಿದೆ.

-------------------------------------

ಭಾರತದ ಪ್ರಥಮ ತಂತ್ರಜ್ಞಾನ ಆಧಾರಿತ ಭಾಷಾ ಸಂಗ್ರಹಾಲಯ: ‘ಶಬ್ದಲೋಕ’

ಕೇಂದ್ರ ಸಂಸ್ಕೃತಿ ಸಚಿವಾಲಯದ ಮಾರ್ಗದರ್ಶನದಲ್ಲಿ ಕೋಲ್ಕತ್ತಾದ ರಾಷ್ಟ್ರೀಯ ಗ್ರಂಥಾಲಯದ ಬೆಲ್ವೆಡೆರೆ ಹೌಸ್‌ನಲ್ಲಿ ಜುಲೈ 19, 2026 ರಂದು ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಂದ ಉದ್ಘಾಟನೆಗೊಂಡ ಭಾರತದ ಮೊದಲ ಇಮರ್ಸಿವ್ ಭಾಷಾ ಸಂಗ್ರಹಾಲಯವಾದ 'ಶಬ್ದಲೋಕ', ಕೃತಕ ಬುದ್ಧಿಮತ್ತೆ (AI) ಮತ್ತು ವರ್ಧಿತ ರಿಯಾಲಿಟಿ (AR) ನಂತಹ ಆಧುನಿಕ ಡಿಜಿಟಲ್ ತಂತ್ರಜ್ಞಾನ, 380ಕ್ಕೂ ಹೆಚ್ಚು ಭಾಷೆಗಳ ಪ್ರದರ್ಶನಗಳು ಹಾಗೂ 9 ವೈವಿಧ್ಯಮಯ ಗ್ಯಾಲರಿಗಳ ಮೂಲಕ 121 ಪ್ರಮುಖ ಭಾಷೆಗಳು ಸೇರಿದಂತೆ ಭಾರತದ ಶ್ರೀಮಂತ ಭಾಷಾ ಪರಂಪರೆ, ಇತಿಹಾಸ ಮತ್ತು ಸಾಂಸ್ಕೃತಿಕ ವಿಕಸನವನ್ನು ಪರಿಣಾಮಕಾರಿಯಾಗಿ ಪರಿಚಯಿಸುವ ಪ್ರಮುಖ ಕೇಂದ್ರವಾಗಿ ಹೊರಹೊಮ್ಮಿದೆ.

----------------------------------

ಎನ್.ಎಸ್.ಇ ಸಂಸ್ಥೆಯಿಂದ 'ಎಲೆಕ್ಟ್ರಾನಿಕ್ ಗೋಲ್ಡ್ ರಿಸೀಪ್ಟ್ (EGR)' ವಿಭಾಗದ ನೂತನ ಚಾಲನೆ

ಸೆಬಿ (SEBI) ಮಾನ್ಯತೆ ಪಡೆದ ರಾಷ್ಟ್ರೀಯ ಶೇರು ವಿನಿಮಯ ಕೇಂದ್ರವು (NSE) ಭಾರತದ ಭೌತಿಕ ಚಿನ್ನದ ಮಾರುಕಟ್ಟೆಯನ್ನು ಹೆಚ್ಚು ಪಾರದರ್ಶಕ ಹಾಗೂ ಸುಸಂಘಟಿತ ಚೌಕಟ್ಟಿಗೆ ತರುವ ಉದ್ದೇಶದಿಂದ 'ಎಲೆಕ್ಟ್ರಾನಿಕ್ ಗೋಲ್ಡ್ ರಿಸೀಪ್ಟ್' (EGR) ಎಂಬ ನೂತನ ಡಿಜಿಟಲ್ ಪ್ರತಿಪತ್ರ ವಹಿವಾಟನ್ನು ಅಧಿಕೃತವಾಗಿ ಆರಂಭಿಸಿದ್ದು, ಇದರ ಮೂಲಕ ಹೂಡಿಕೆದಾರರು ಸುರಕ್ಷಿತ ವಾಲ್ಟ್‌ಗಳಲ್ಲಿ ಭದ್ರವಾಗಿಟ್ಟಿರುವ ನೈಜ ಚಿನ್ನದ ಹಿನ್ನೆಲೆ ಹೊಂದಿರುವ ಶೇರುಗಳಂತೆಯೇ ತಮ್ಮ ಡಿಮ್ಯಾಟ್ ಖಾತೆಯಲ್ಲಿ ಚಿನ್ನವನ್ನು ಡಿಜಿಟಲ್ ರೂಪದಲ್ಲಿ ಖರೀದಿಸಲು, ವಹಿವಾಟು ನಡೆಸಲು ಮತ್ತು ಅಗತ್ಯವಿದ್ದಾಗ ಅದನ್ನು ನೇರವಾಗಿ ಭೌತಿಕ ಚಿನ್ನವಾಗಿ ಮರಳಿ ಪಡೆಯಲು ಅತ್ಯುತ್ತಮ ಅವಕಾಶ ಲಭ್ಯವಾಗಿದೆ.

-----------------------------------

ಲಾರ್ಡ್ಸ್ ಮೈದಾನದಲ್ಲಿ ರೋಹಿತ್ ಶರ್ಮಾ ಐತಿಹಾಸಿಕ ಶತಕ ಹಾಗೂ ನೂತನ ವಿಶ್ವ ದಾಖಲೆಗಳ ಪರ್ವ

ಭಾರತೀಯ ಕ್ರಿಕೆಟ್ ತಂಡದ ಜವಾಬ್ದಾರಿಯುತ ಆರಂಭಿಕ ಆಟಗಾರ ರೋಹಿತ್ ಶರ್ಮಾ ಅವರು ಲಂಡನ್‌ನ ಪ್ರಸಿದ್ಧ ಲಾರ್ಡ್ಸ್ ಮೈದಾನದಲ್ಲಿ ತಮ್ಮ 34ನೇ ಏಕದಿನ ಶತಕ ಬಾರಿಸುವ ಮೂಲಕ ಲಾರ್ಡ್ಸ್‌ನಲ್ಲಿ ಶತಕ ಸಿಡಿಸಿದ ಮೊದಲ ಭಾರತೀಯ ಪುರುಷ ಕ್ರಿಕೆಟಿಗ, 39ನೇ ವಯಸ್ಸಿನಲ್ಲಿ (39 ವರ್ಷ 80 ದಿನ) ಶತಕ ಸಾಧಿಸಿದ ಅತ್ಯಂತ ಹಿರಿಯ ಭಾರತೀಯ, ವಿದೇಶಿ ನೆಲವೊಂದರಲ್ಲಿ ಅತಿ ಹೆಚ್ಚು (ಇಂಗ್ಲೆಂಡ್‌ನಲ್ಲಿ 8) ಏಕದಿನ ಶತಕ ಗಳಿಸಿದ ಬ್ಯಾಟರ್ ಹಾಗೂ ಆರಂಭಿಕ ಆಟಗಾರನಾಗಿ ಅತಿ ಹೆಚ್ಚು ಅಂತರರಾಷ್ಟ್ರೀಯ ಶತಕ (46) ಗಳಿಸಿದ ಆಟಗಾರ ಎಂಬ ಸಾಲು ಸಾಲು ವಿಶ್ವ ದಾಖಲೆಗಳನ್ನು ಬರೆದು ಸಚಿನ್ ತೆಂಡೂಲ್ಕರ್ ಅವರ ಪ್ರಮುಖ ದಾಖಲೆಗಳನ್ನು ಮುರಿದಿದ್ದಾರೆ.

--------------------------------------

ದೆಹಲಿಯಲ್ಲಿ NEET ಅಕ್ರಮ ವಿರೋಧಿಸಿ ಭುಗಿಲೆದ್ದ 'ಸಂಸತ್ ಚಲೋ' ಪ್ರತಿಭಟನೆ

ಸಂಸತ್ತಿನ ಮುಂಗಾರು ಅಧಿವೇಶನ ಪ್ರಾರಂಭವಾದ ಹಿನ್ನೆಲೆಯಲ್ಲಿ, ನೀಟ್-ಯುಜಿ (NEET-UG) ಪ್ರಶ್ನೆ ಪತ್ರಿಕೆ ಸೋರಿಕೆ ಖಂಡಿಸಿ ಹಾಗೂ ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಅವರ ರಾಜೀನಾಮೆಗೆ ಆಗ್ರಹಿಸಿ ಸಿಜಿಪಿ (CJP) ಸಂಸ್ಥಾಪಕ, ಶಿಕ್ಷಣ ಸುಧಾರಕ ಸೋನಮ್ ವಾಂಗ್ಚುಕ್ ಅವರ ಪತ್ನಿ ಗೀತಾಂಜಲಿ ಆಂಗ್ಲ ಮತ್ತು ಸಾವಿರಾರು ಯುವಕರು ಜಂತರ್ ಮಂತರ್‌ನಿಂದ ಸಂಸತ್ ಭವನದತ್ತ ನಡೆಸಿದ 'ಸಂಸತ್ ಚಲೋ' ಬೃಹತ್ ಮೆರವಣಿಗೆಯು ಉದ್ವಿಗ್ನ ವಾತಾವರಣ ಮತ್ತು ಹಿಂಸಾಚಾರಕ್ಕೆ ಸಾಕ್ಷಿಯಾಯಿತಲ್ಲದೆ, ಪರಿಸ್ಥಿತಿ ತಿಳಿಗೊಳಿಸಲು ಕೇಂದ್ರ ಸಚಿವ ಜಿ.ಪಿ. ನಡ್ಡಾ ಅವರು ಪ್ರತಿಭಟನಾಕಾರರೊಂದಿಗೆ ತುರ್ತು ಮಾತುಕತೆ ನಡೆಸಿದರು.

________________________________________________________________________________

ಅಂತಾರಾಷ್ಟ್ರೀಯ ಸುದ್ದಿಗಳು :

ಸ್ಪೇನ್ ತಂಡಕ್ಕೆ ಎರಡನೇ ಬಾರಿ ಫಿಫಾ ವಿಶ್ವಕಪ್ ಮುಕುಟ

ಫಿಫಾ ವಿಶ್ವಕಪ್ 2026ರ ಫೈನಲ್ ಪಂದ್ಯದಲ್ಲಿ ಸ್ಪೇನ್ ತಂಡವು ಹಾಲಿ ಚಾಂಪಿಯನ್ ಅರ್ಜೆಂಟಿನಾವನ್ನು 1-0 ಗೋಲುಗಳಿಂದ ಮಣಿಸಿ, 2010ರ ನಂತರ ಎರಡನೇ ಬಾರಿಗೆ ವಿಶ್ವ ಚಾಂಪಿಯನ್ ಆಗಿ ಹೊರಹೊಮ್ಮಿದೆ. ಈ ಚಾರಿತ್ರಿಕ ಪಂದ್ಯದಲ್ಲಿ ಬದಲೀ ಆಟಗಾರನಾಗಿ ಬಂದ ಫೆರಾನ್ ಟೋರೆಸ್ 106ನೇ ನಿಮಿಷದಲ್ಲಿ (ಎಕ್ಸ್ಟ್ರಾ ಟೈಮ್) ನಿರ್ಣಾಯಕ ಗೋಲು ಬಾರಿಸಿ ಸ್ಪೇನ್‌ಗೆ ಭರ್ಜರಿ ಜಯ ತಂದಿತ್ತರು. ಟೂರ್ನಿಯುದ್ದಕ್ಕೂ ಕೇವಲ 1 ಗೋಲು ಮಾತ್ರ ಬಿಟ್ಟುಕೊಟ್ಟು ಅತ್ಯುತ್ತಮ ರಕ್ಷಣಾತ್ಮಕ ಸಾಧನೆ ತೋರಿದ ಸ್ಪೇನ್ ತಂಡವನ್ನು ತಾಯ್ನಾಡಿನ ಮ್ಯಾಡ್ರಿಡ್‌ನಲ್ಲಿ 20 ಲಕ್ಷಕ್ಕೂ ಹೆಚ್ಚು ಅಭಿಮಾನಿಗಳು ಅತ್ಯಂತ ಸಂಭ್ರಮದಿಂದ ಅದ್ದೂರಿಯಾಗಿ ಸ್ವಾಗತಿಸಿದರು.

 ಟೂರ್ನಿಯ ಮುಖ್ಯ ಪ್ರಶಸ್ತಿಗಳು ಮತ್ತು ಸಾಧನೆಗಳು:

 ಚಿನ್ನದ ಬೂಟು ಪ್ರಶಸ್ತಿ (Golden Boot): ಕೈಲಿಯನ್ ಎಂಬಾಪೆ (ಫ್ರಾನ್ಸ್) – 10 ಗೋಲುಗಳು.

ಇತರ ಪ್ರಮುಖ ಗೋಲ್ ಸ್ಕೋರರ್: ಲಯೋನೆಲ್ ಮೆಸ್ಸಿ (ಅರ್ಜೆಂಟೀನಾ) – 8 ಗೋಲುಗಳು.

ವಿಶ್ವಕಪ್ ಇತಿಹಾಸದಲ್ಲೇ ಗರಿಷ್ಠ ಗೋಲು ಬಾರಿಸಿದ ಸಾರ್ವಕಾಲಿಕ ದಾಖಲೆ: ಕೈಲಿಯನ್ ಎಂಬಾಪೆ (22 ಗೋಲುಗಳು): ವಿಶ್ವಕಪ್ ಇತಿಹಾಸದಲ್ಲಿಯೇ ಅತ್ಯಂತ ಹೆಚ್ಚು ಗೋಲು ಗಳಿಸಿದ ಆಟಗಾರ ಎಂಬ ನೂತನ ದಾಖಲೆ ನಿರ್ಮಿಸಿದರು.

ಇವರು ಲಯೋನೆಲ್ ಮೆಸ್ಸಿ (21 ಗೋಲುಗಳು) ಅವರ ದಾಖಲೆಯನ್ನು ಮುರಿದರು.

ಸ್ಪೇನ್ ತಂಡದ ಪ್ರಮುಖ ಸಾಧನೆಗಳು:

ಫೈನಲ್ ಪಂದ್ಯದ ಫಲಿತಾಂಶ: ಸ್ಪೇನ್ 1 – 0 ಅರ್ಜೆಂಟೀನಾ.

ವಿಜೇತ ಗೋಲು: ಫೆರಾನ್ ಟೊರೆಸ್ (106ನೇ ನಿಮಿಷದಲ್ಲಿ).

ಸ್ಪೇನ್ ಒಟ್ಟು ಗಳಿಸಿದ ಗೋಲುಗಳು: 14.

ಅತ್ಯುತ್ತಮ ರಕ್ಷಣೆ: ಆಡಿದ 8 ಪಂದ್ಯಗಳಲ್ಲಿ ಸ್ಪೇನ್ ಬಿಟ್ಟುಕೊಟ್ಟಿದ್ದು ಕೇವಲ 1 ಗೋಲು ಮಾತ್ರ.

ನಾಯಕ: ರೊಡ್ರಿ.

ಅತಿ ಹೆಚ್ಚು ಪ್ರಶಸ್ತಿ ಗೆದ್ದ ದೇಶಗಳ ಪಟ್ಟಿ: 

ಬ್ರೆಜಿಲ್ (5) (ಅತಿ ಹೆಚ್ಚು) 1958, 1962, 1970, 1994, 2002 

ಜರ್ಮನಿ (4) 1954, 1974, 1990, 2014 |

ಇಟಲಿ (4)1934, 1938, 1982, 2006

ಅರ್ಜೆಂಟೀನಾ (3) 1978, 1986, 2022

ಫ್ರಾನ್ಸ್ (2) 1998, 2018 

ಉರುಗ್ವೆ (2) 1930 (ಮೊದಲ ವಿಶ್ವಕಪ್), 1950 

ಸ್ಪೇನ್ ( 2) 2010, 2026

ಇಂಗ್ಲೆಂಡ್ (1) 1966

ಪ್ರಮುಖ ಅಂಶಗಳು:

 1.ಅತಿ ಹೆಚ್ಚು ಫಿಫಾ ವಿಶ್ವಕಪ್ ಗೆದ್ದ ದೇಶ: ಬ್ರೆಜಿಲ್ (5 ಬಾರಿ).

 2.ಮೊದಲ ಫಿಫಾ ವಿಶ್ವಕಪ್ ವಿಜೇತ ದೇಶ: ಉರುಗ್ವೆ (1930).

 3. ಸ್ಪೇನ್ ದೇಶದ ವಿಶ್ವಕಪ್‌ಗಳು: 2 (2010 ಮತ್ತು 2026).

------------------------------------

58ನೇ ಅಂತರರಾಷ್ಟ್ರೀಯ ರಸಾಯನಶಾಸ್ತ್ರ ಒಲಿಂಪಿಯಾಡ್ (IChO 2026)

ಉಜ್ಬೇಕಿಸ್ತಾನದ ತಾಷ್ಕೆಂಟ್ ನಗರದಲ್ಲಿ ಜುಲೈ 10–19, 2026ರಂದು ನಡೆಯಿತು. ಇದರಲ್ಲಿ 93ಕ್ಕೂ ಹೆಚ್ಚು ದೇಶಗಳ ವಿದ್ಯಾರ್ಥಿಗಳು ಭಾಗವಹಿಸಿದ್ದರು. ಭಾರತವನ್ನು ಪ್ರತಿನಿಧಿಸಿದ ದೇವದತ್ತ ಪ್ರಿಯದರ್ಶಿ, ಹರ್ಷಿತ್ ಸಿಂಗ್ಲಾ, ಕಬೀರ್ ಚಿಲ್ಲಾರ್ ಮತ್ತು ಸಂದೀಪ್ ಕುಚಿ ಅವರು ನಾಲ್ವರೂ ಚಿನ್ನದ ಪದಕಗಳನ್ನು ಗೆದ್ದು, ಭಾರತದ ಇತಿಹಾಸದಲ್ಲೇ ಮೊದಲ ಬಾರಿಗೆ ಎಲ್ಲಾ ಸ್ಪರ್ಧಿಗಳು ಚಿನ್ನದ ಪದಕ ಗೆದ್ದ ಸಾಧನೆ ಮಾಡಿದರು. ದೇಶವಾರು ಪದಕ ಪಟ್ಟಿಯಲ್ಲಿ ಭಾರತವು ಚೀನಾ, ವಿಯೆಟ್ನಾಂ ಹಾಗೂ Individual Participants Group B (ರಷ್ಯಾದ ವೈಯಕ್ತಿಕ ಸ್ಪರ್ಧಿಗಳ ಗುಂಪು) ಜೊತೆ ಜಂಟಿ ಪ್ರಥಮ ಸ್ಥಾನ ಪಡೆದಿತು. 

----------------------------------------------

ಬ್ರಿಟನ್ ನೂತನ ಪ್ರಧಾನಿಯಾಗಿ ಆಂಡಿ ಬರ್ನ್‌ಹ್ಯಾಮ್ 

ಮಾಜಿ ಪ್ರಧಾನಿ ಕೀರ್ ಸ್ಟಾರ್ಮರ್ ಅವರ ರಾಜೀನಾಮೆಯ ನಂತರ ಬ್ರಿಟನ್‌ನ ಆಡಳಿತಾರೂಢ ಲೇಬರ್ ಪಾರ್ಟಿಯ ಬಹುತೇಕ ಸಂಸದರ ಅಭೂತಪೂರ್ವ ಬೆಂಬಲದೊಂದಿಗೆ ನಾಯಕತ್ವದ ಸ್ಪರ್ಧೆಯಲ್ಲಿ ಏಕೈಕ ಪ್ರಬಲ ನಾಯಕರಾಗಿ ಹೊರಹೊಮ್ಮಿದ ಗ್ರೇಟರ್ ಮಾಂಚೆಸ್ಟರ್‌ನ ಮಾಜಿ ಮೇಯರ್ ಆಂಡಿ ಬರ್ನ್‌ಹ್ಯಾಮ್ ಅವರು, ಜುಲೈ 20, 2026 ರಂದು ಲಂಡನ್‌ನ ಪ್ರತಿಷ್ಠಿತ ಬಕಿಂಗ್‌ಹ್ಯಾಮ್ ಅರಮನೆಯಲ್ಲಿ ಬ್ರಿಟನ್‌ ರಾಜ ಕಿಂಗ್ ಚಾರ್ಲ್ಸ್ III ಅವರಿಂದ ನೂತನ ಸರ್ಕಾರ ರಚನೆಯ ಆಹ್ವಾನ ಪಡೆದುಕೊಂಡು ಯುಕೆಯ 59ನೇ ಪ್ರಧಾನಮಂತ್ರಿಯಾಗಿ ಅಧಿಕೃತವಾಗಿ ಪದಗ್ರಹಣ ಮಾಡುವ ಮೂಲಕ, ಕಳೆದ 10 ವರ್ಷಗಳ ಅವಧಿಯಲ್ಲಿ ಬ್ರಿಟನ್ ಅಧಿಕಾರ ಪೀಠಕ್ಕೇರಿದ 7ನೇ ಪ್ರಧಾನಿ ಎಂಬ ವಿಶಿಷ್ಟ ದಾಖಲೆಯನ್ನು ತಮ್ಮದಾಗಿಸಿಕೊಂಡಿದ್ದಾರೆ.

---------------------------------------------

ಭಾರತ-ಶ್ರೀಲಂಕಾ 'DTAA' ಒಪ್ಪಂದಕ್ಕೆ ತಿದ್ದುಪಡಿ: ತೆರಿಗೆ ವಂಚನೆ ತಡೆಗೆ 'PPT' ನಿಯಮ ಜಾರಿ

ಭಾರತ ಮತ್ತು ಶ್ರೀಲಂಕಾ ನಡುವಿನ ದ್ವಿಪಕ್ಷೀಯ ತೆರಿಗೆ ವಿನಾಯಿತಿ ಒಪ್ಪಂದಕ್ಕೆ (DTAA : Double Taxation Avoidance Agreement) ಹೊಸ ತಿದ್ದುಪಡಿ ತರಲಾಗಿದ್ದು, ಕೃತಕ ಕಂಪನಿಗಳ ರಚನೆ ಮತ್ತು 'ಟ್ರಿಟಿ ಶಾಪಿಂಗ್' ಮೂಲಕ ನಡೆಯುವ ಅಕ್ರಮ ತೆರಿಗೆ ವಂಚನೆಯನ್ನು ತಡೆಯಲು ಜೂನ್ 19, 2026 ರಿಂದ ಜಾರಿಗೆ ಬರುವಂತೆ 'ಪ್ರಿನ್ಸಿಪಲ್ ಪರ್ಪಸ್ ಟೆಸ್ಟ್' (PPT) ಎಂಬ ಕಠಿಣ ನಿಯಮವನ್ನು ಸೇರ್ಪಡೆಗೊಳಿಸಲಾಗಿದೆ. ಈ ಹೊಸ ನಿಯಮಗಳು ಆರ್ಥಿಕ ವರ್ಷ 2027-28 ರಿಂದ ಬರುವ ಆದಾಯಕ್ಕೆ ಅನ್ವಯವಾಗಲಿದ್ದು, ಚಾಲ್ತಿಯಲ್ಲಿರುವ ತೆರಿಗೆ ದರಗಳಲ್ಲಿ ಯಾವುದೇ ಬದಲಾವಣೆ ಮಾಡದೆ ಕೇವಲ ತೆರಿಗೆ ಅಕ್ರಮಗಳನ್ನು ತಡೆಯುವುದನ್ನೇ ಪ್ರಮುಖ ಉದ್ದೇಶವಾಗಿಸಿಕೊಂಡಿವೆ.

________________________________________________________________________________

19 & 20 Current Affairs ಪ್ರಚಲಿತ ವಿದ್ಯಮಾನಗಳು

 

ರಾಜ್ಯ ಸುದ್ದಿಗಳು :

ಕರ್ನಾಟಕ ಸಾಫ್ಟ್‌ವೇರ್ ರಫ್ತುಗೆ ದೇಶದಲ್ಲಿಯೇ ಅಗ್ರಸ್ಥಾನ 

ದೇಶದ ಒಟ್ಟು ಸಾಫ್ಟ್‌ವೇರ್ ರಫ್ತಿನಲ್ಲಿ ಶೇಕಡಾ ೪೧ ಹಾಗೂ ಒಟ್ಟು ರಫ್ತು ಪ್ರಮಾಣದಲ್ಲಿ ಶೇಕಡಾ ೨೪ ರಷ್ಟು ಪಾಲು ಹೊಂದುವ ಮೂಲಕ ಭಾರತದಲ್ಲೇ ಅಗ್ರಸ್ಥಾನ ಕಾಯ್ದುಕೊಂಡಿರುವ ಕರ್ನಾಟಕವು, ರಾಜ್ಯ ಸರ್ಕಾರಿ ಮುಖ್ಯ ಕಾರ್ಯದರ್ಶಿ ಡಾ. ಶಾಲಿನಿ ರಜನೀಶ್ ಅಧ್ಯಕ್ಷತೆಯ ರಾಜ್ಯಮಟ್ಟದ ರಫ್ತು ಉತ್ತೇಜನಾ ಸಮಿತಿ (SLEPC) ಸಭೆಯಲ್ಲಿ ಈ ಅಧಿಕೃತ ದತ್ತಾಂಶ ಹಂಚಿಕೊಂಡಿದ್ದು, ಕೇಂದ್ರದ 'ಡಿಸ್ಟ್ರಿಕ್ಟ್ ಆಸ್ ಎಕ್ಸ್‌ಪೋರ್ಟ್ ಹಬ್ (DEH)' ಯೋಜನೆಯಡಿ ರಾಜ್ಯದ ಪ್ರಮುಖ ಐದು ಜಿಲ್ಲೆಗಳು ಆಯ್ಕೆಯಾಗುವುದರ ಜೊತೆಗೆ ರಫ್ತು ವಹಿವಾಟು ಹೆಚ್ಚಿಸಲು ಇ-ಕಾಮರ್ಸ್ ನೆರವು, ಸಾಗಣೆ ವೆಚ್ಚ ಸಬ್ಸಿಡಿ, ಗೋದಾಮು ಸೌಲಭ್ಯ ಹಾಗೂ ತರಬೇತಿ ಕಾರ್ಯಾಗಾರಗಳಂತಹ ನೂತನ ಕಾರ್ಯಕ್ರಮಗಳನ್ನು ಘೋಷಿಸಿದೆ.

-----------------------------------

ಬಳ್ಳಾರಿಯ ಸಂಡೂರು ಗುಹೆಗಳಲ್ಲಿ 10,000 ವರ್ಷ ಹಳೆಯ ಆದಿಮಾನವ ನೆಲೆ ಪತ್ತೆ

ಬಳ್ಳಾರಿ ಜಿಲ್ಲೆಯ ಸಂಡೂರು ತಾಲೂಕಿನ ಸ್ವಾಮಿಮಲೈ ಬೆಟ್ಟಸಾಲಿನ ದೇವದಾರಿ ಗುಹೆಗಳಲ್ಲಿ ಲಭ್ಯವಾದ ಪಳೆಯುಳಿಕೆಗಳನ್ನು ಕಾರ್ಬನ್ ಡೇಟಿಂಗ್‌ಗೆ ಒಳಪಡಿಸಿದಾಗ, ಅವು ಸುಮಾರು 10,000 ವರ್ಷಗಳಷ್ಟು ಹಳೆಯ ಮಧ್ಯಶಿಲಾಯುಗ ಹಾಗೂ ಸುಮಾರು 5,000 ವರ್ಷಗಳಷ್ಟು ಹಳೆಯ ನವಶಿಲಾಯುಗದ ಮಾನವ ವಾಸಸ್ಥಾನವೆಂದು ದೃಢಪಟ್ಟಿದೆ. ಪ್ರಸಿದ್ಧ ಪ್ರಾಗೈತಿಹಾಸಿಕ ತಜ್ಞ ಪ್ರೊ. ರವಿ ಕೋರಿಶೆಟ್ಟರ್ ನೇತೃತ್ವದ ತಂಡ ನಡೆಸಿದ ಈ ಸಂಶೋಧನೆಯು ದಕ್ಷಿಣ ಭಾರತದಲ್ಲೇ ಅತಿ ಎತ್ತರದ ಪ್ರದೇಶದಲ್ಲಿ (ಸಮುದ್ರ ಮಟ್ಟದಿಂದ 850 ಮೀಟರ್) ಕಂಡುಬಂದ ಪ್ರಪ್ರಥಮ ಗುಹಾ ವಾಸಸ್ಥಳವೆಂಬ ಹೆಗ್ಗಳಿಕೆಗೆ ಪಾತ್ರವಾಗಿದ್ದು, ಇಲ್ಲಿ ಸೂಕ್ಷ್ಮ ಶಿಲಾ ಆಯುಧಗಳು ಹಾಗೂ ಸಾಕುಪ್ರಾಣಿಗಳ ಮೂಳೆಗಳು ದೊರೆತಿವೆ.

________________________________________________________________________________

ರಾಷ್ಟ್ರೀಯ ಸುದ್ದಿಗಳು :

ಯುರೋಪಿನ ಮೂರು ರಾಷ್ಟ್ರಗಳ ಐತಿಹಾಸಿಕ ಪ್ರವಾಸದಲ್ಲಿ ರಾಷ್ಟ್ರಪತಿ ದ್ರೌಪದಿ ಮುರ್ಮು

ಭಾರತ ಮತ್ತು ಪೂರ್ವ ಯುರೋಪಿಯನ್ ರಾಷ್ಟ್ರಗಳ ನಡುವಿನ ದ್ವಿಪಕ್ಷೀಯ ಬಾಂಧವ್ಯವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಗೌರವಾನ್ವಿತ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅವರು ಜುಲೈ 19 ರಿಂದ 25 ರವರೆಗೆ ಮೊಲ್ಡೋವಾ, ಉತ್ತರ ಮ್ಯಾಸಿಡೋನಿಯಾ ಹಾಗೂ ರೊಮೇನಿಯಾ ದೇಶಗಳಿಗೆ ಅಧಿಕೃತ ಭೇಟಿ ನೀಡುತ್ತಿದ್ದು, ಇದರಲ್ಲಿ ಮೊಲ್ಡೋವಾ ಮತ್ತು ಉತ್ತರ ಮ್ಯಾಸಿಡೋನಿಯಾಗಳಿಗೆ ಭಾರತದ ರಾಷ್ಟ್ರಪತಿಯೊಬ್ಬರು ಪ್ರಥಮ ಬಾರಿಗೆ ಭೇಟಿ ನೀಡುತ್ತಿರುವುದು ರಾಜತಾಂತ್ರಿಕ ಇತಿಹಾಸದಲ್ಲೇ ಮೈಲಿಗಲ್ಲಾಗಿದೆ ಎಂದು ವಿದೇಶಾಂಗ ಸಚಿವಾಲಯವು ಮಾಹಿತಿ ನೀಡಿದೆ.

----------------------------------

 'ಮಹಾಪ್ರಭು ಜಗನ್ನಾಥ್' ಸಿನಿಮಾ ಬಿಡುಗಡೆಗೆ ಸುಪ್ರೀಂ ಸೂಚನೆ

ವಿವಾದಕ್ಕೀಡಾಗಿದ್ದ 'ಮಹಾಪ್ರಭು ಜಗನ್ನಾಥ್' ಅನಿಮೇಟೆಡ್ ಚಲನಚಿತ್ರವನ್ನು ರಥಯಾತ್ರೆ ಮತ್ತು ಧಾರ್ಮಿಕ ವಿಧಿವಿಧಾನಗಳು ಪೂರ್ಣಗೊಂಡ ನಂತರ ಅಂದರೆ ಜುಲೈ ೨೮ ರ ಬಳಿಕವಷ್ಟೇ ಪ್ರದರ್ಶಿಸಲು ಸುಪ್ರೀಂ ಕೋರ್ಟ್ ನಿಬಂಧನೆಗಳೊಂದಿಗೆ ಸಮ್ಮತಿಸಿದೆ.

-----------------------------------

ಚಂಡೀಗಢದಲ್ಲಿ ಚಾಲನೆಗೊಂಡ ಪ್ರಮುಖ ಅಭಿವೃದ್ಧಿ ಯೋಜನೆಗಳು ಮತ್ತು PGIMER ನವೀನ ಆರೋಗ್ಯ ಕೇಂದ್ರಗಳು

ದೇಶದ ಮೂಲಸೌಕರ್ಯ, ಶಿಕ್ಷಣ ಹಾಗೂ ಸಾರ್ವಜನಿಕ ಸೇವೆಗಳನ್ನು ಮತ್ತಷ್ಟು ಸುದೃಢಗೊಳಿಸುವ ಗುರಿಯೊಂದಿಗೆ ಪ್ರಧಾನಿ ನರೇಂದ್ರ ಮೋದಿ ಅವರು ಚಂಡೀಗಢದಲ್ಲಿ ಒಟ್ಟು ₹4,700 ಕೋಟಿಗೂ ಅಧಿಕ ಮೌಲ್ಯದ ವಿವಿಧ ಯೋಜನೆಗಳಿಗೆ ಶಂಕುಸ್ಥಾಪನೆ ಮತ್ತು ಲೋಕಾರ್ಪಣೆ ನೆರವೇರಿಸಿದ್ದು, ಇದರಲ್ಲಿ ಪ್ರಸಿದ್ಧ PGIMER ಸಂಸ್ಥೆಯ ಅತ್ಯಾಧುನಿಕ 300 ಹಾಸಿಗೆಗಳ ‘ಸುಧಾರಿತ ತಾಯಿ ಮತ್ತು ಮಗು ಕೇಂದ್ರ’ ಹಾಗೂ ನರರೋಗ ತಜ್ಞರ ವೈದ್ಯಕೀಯ ಸೇವೆಗಳನ್ನು ಒಂದೇ ಸೂರಿನಡಿ ನೀಡುವ ‘ಸುಧಾರಿತ ನರವಿಜ್ಞಾನ ಕೇಂದ್ರ’ಗಳ ಉದ್ಘಾಟನೆಯೂ ಸೇರಿದೆ.

-------------------------------------------

ಭಾರತೀಯ ನೌಕಾಪಡೆಗೆ ಅಮೆರಿಕದಿಂದ ಅತ್ಯಾಧುನಿಕ 'MH-60R ಸಿಹಾಕ್' ಹೆಲಿಕಾಪ್ಟರ್ ಹಸ್ತಾಂತರ

ಭಾರತೀಯ ನೌಕಾಪಡೆಯ ಸಾಮರ್ಥ್ಯವನ್ನು ಮತ್ತಷ್ಟು ಹೆಚ್ಚಿಸಲು 2020ರಲ್ಲಿ ಅಮೆರಿಕದೊಂದಿಗೆ ಮಾಡಿಕೊಂಡಿದ್ದ 24 'MH-60R ಸಿಹಾಕ್' ಹೆಲಿಕಾಪ್ಟರ್‌ಗಳ ರಕ್ಷಣಾ ಒಪ್ಪಂದದ ಭಾಗವಾಗಿ, ಅಮೆರಿಕ ಸರ್ಕಾರವು ಇತ್ತೀಚೆಗೆ ಕೇರಳದ ಕೊಚ್ಚಿ ತೀರಕ್ಕೆ ಮತ್ತೊಂದು ಅತ್ಯಾಧುನಿಕ ಸಿಹಾಕ್ ಹೆಲಿಕಾಪ್ಟರ್ ಅನ್ನು ಯಶಸ್ವಿಯಾಗಿ ಹಸ್ತಾಂತರಿಸಿದ್ದು, ಇದು ಭಾರತೀಯ ನೌಕಾಪಡೆಯ ಜಲಸೇನಾ ಕ್ಷಮತೆಯನ್ನು ಗಮನಾರ್ಹವಾಗಿ ಬಲಪಡಿಸಲಿದೆ.

----------------------------------------------

ಭಾರತದ ಖಾಸಗಿ ಬಾಹ್ಯಾಕಾಶ ಕ್ಷೇತ್ರದಲ್ಲಿ ಹೊಸ ಮೈಲಿಗಲ್ಲು: 'ವಿಕ್ರಮ್-1' ರಾಕೆಟ್ ಯಶಸ್ವಿ ಉಡಾವಣೆ

ಹೈದರಾಬಾದ್‌ನ ನವೋದ್ಯಮ 'ಸ್ಕೈರೂಟ್ ಏರೋಸ್ಪೇಸ್' ಸಂಪೂರ್ಣ ದೇಸೀಯ ತಂತ್ರಜ್ಞಾನದಲ್ಲಿ ನಿರ್ಮಿಸಿದ, 22 ಮೀಟರ್ ಎತ್ತರ ಹಾಗೂ ಸಂಪೂರ್ಣ ಕಾರ್ಬನ್ ಕಾಂಪೋಸಿಟ್ ಕಾಯ ಮತ್ತು 3D-ಪ್ರಿಂಟೆಡ್ ಎಂಜಿನ್ ಒಳಗೊಂಡಿರುವ ಭಾರತದ ಮೊದಲ ಖಾಸಗಿ ಆರ್ಬಿಟಲ್ ರಾಕೆಟ್ 'ವಿಕ್ರಮ್-1', ಶ್ರೀಹರಿಕೋಟಾದ ಸತೀಶ್ ಧವನ್ ಬಾಹ್ಯಾಕಾಶ ಕೇಂದ್ರದಿಂದ 'ಮಿಷನ್ ಆಗಮನ್' ಮೂಲಕ ಯಶಸ್ವಿಯಾಗಿ ಉಡಾವಣೆಯಾಗಿದ್ದು, ಕೇವಲ 17 ನಿಮಿಷಗಳಲ್ಲಿ 350 ಕೆಜಿ ತೂಕದ ಉಪಗ್ರಹಗಳನ್ನು 450 ಕಿ.ಮೀ ಎತ್ತರದ ಕೆಳ-ಭೂ ಕಕ್ಷೆಗೆ (LEO) ತಲುಪಿಸುವ ಸಾಮರ್ಥ್ಯ ಪ್ರದರ್ಶಿಸುವುದರೊಂದಿಗೆ, ಖಾಸಗಿ ರಾಕೆಟ್ ಅನ್ನು ಕಕ್ಷೆಗೆ ತಲುಪಿಸಿದ ಅಮೆರಿಕ ಮತ್ತು ಚೀನಾ ನಂತರದ ವಿಶ್ವದ 3ನೇ ದೇಶವಾಗಿ ಭಾರತ ಐತಿಹಾಸಿಕ ಸಾಧನೆಗೆ ಪಾತ್ರವಾಗಿದೆ.

-------------------------------------------

'ಅಮೃತ್ ಭಾರತ್ ಸ್ಟೇಷನ್ ಯೋಜನೆ' ಭಾರತೀಯ ರೈಲ್ವೆ ನಿಲ್ದಾಣಗಳ ಆಧುನಿಕರಣ :

ಭಾರತೀಯ ರೈಲ್ವೆಯ ಮೂಲಸೌಕರ್ಯವನ್ನು ಮೇಲ್ದರ್ಜೆಗೇರಿಸಿ ಪ್ರಯಾಣಿಕರಿಗೆ ಜಾಗತಿಕ ಮಟ್ಟದ ಅನುಭವ ನೀಡಲು ಡಿಸೆಂಬರ್ 2022 ರಲ್ಲಿ ರೈಲ್ವೆ ಸಚಿವಾಲಯದಿಂದ ಆರಂಭಿಸಲಾದ ‘ಅಮೃತ್ ಭಾರತ್ ಸ್ಟೇಷನ್ ಯೋಜನೆ’ಯಡಿಯಲ್ಲಿ ದೇಶಾದ್ಯಂತ ಆಯ್ಕೆ ಮಾಡಲಾದ 1,338 ರೈಲು ನಿಲ್ದಾಣಗಳನ್ನು ಸುಸಜ್ಜಿತ ದೀರ್ಘಾವಧಿ ಮಾಸ್ಟರ್ ಪ್ಲಾನ್ ಮೂಲಕ ಆಧುನಿಕಗೊಳಿಸಲಾಗುತ್ತಿದ್ದು, ಇತ್ತೀಚೆಗೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅವರು 20 ರಾಜ್ಯ ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿನ 75 ಮರು-ಅಭಿವೃದ್ಧಿಗೊಂಡ ನಿಲ್ದಾಣಗಳನ್ನು ಉದ್ಘಾಟಿಸುವುದರೊಂದಿಗೆ, ಮಲ್ಟಿ-ಮೋಡಲ್ ಸಾರಿಗೆ ಸಂಪರ್ಕ, ಲಿಫ್ಟ್-ಎಸ್ಕಲೇಟರ್‌ಗಳು, ಉಚಿತ ವೈ-ಫೈ, 24/7 ಸಿಸಿಟಿವಿ ಭದ್ರತಾ ಕಣ್ಣಾವಲು ಹಾಗೂ ವಿಶೇಷಚೇತನ ಸ್ನೇಹಿ ವ್ಯವಸ್ಥೆಗಳನ್ನು ಒದಗಿಸುವ ಈ ಮಹತ್ವಾಕಾಂಕ್ಷಿ ಆಂದೋಲನಕ್ಕೆ ಮತ್ತಷ್ಟು ಗಣನೀಯ ವೇಗ ಮತ್ತು ಹೊಸ ಚೈತನ್ಯ ಲಭಿಸಿದಂತಾಗಿದೆ.

________________________________________________________________________________

ಅಂತಾರಾಷ್ಟ್ರೀಯ ಸುದ್ದಿಗಳು :

ಜಪಾನ್ ಓಪನ್ ಬ್ಯಾಡ್ಮಿಂಟನ್ ಸೂಪರ್ 750 ನಲ್ಲಿ 

ಪಿ. ವಿ. ಸಿಂಧು ಐತಿಹಾಸಿಕ ಜಯ

ಟೋಕಿಯೋದಲ್ಲಿ ನಡೆದ BWF ಜಪಾನ್ ಓಪನ್ ಬ್ಯಾಡ್ಮಿಂಟನ್ ಟೂರ್ನಿಯ ಮಹಿಳಾ ಸಿಂಗಲ್ಸ್ ಫೈನಲ್ ಹಣಾಹಣಿಯಲ್ಲಿ, ಭಾರತದ ತಾರಾ ಆಟಗಾರ್ತಿ ಹಾಗೂ ಎರಡು ಬಾರಿಯ ಒಲಿಂಪಿಕ್ ಪದಕ ವಿಜೇತೆ ಪಿ. ವಿ. ಸಿಂಧು ಅವರು ಜಪಾನ್‌ನ ಪ್ರಬಲ ಸ್ಪರ್ಧಿ ಅಕಾನೆ ಯಮಗುಚಿ ವಿರುದ್ಧ 21-17, 21-17 ನೇರ ಗೇಮ್‌ಗಳಿಂದ 50 ನಿಮಿಷಗಳ ಕಾಲ ನಡೆದ ರೋಚಕ ಕದನದಲ್ಲಿ ಜಯ ಸಾಧಿಸಿ, ತಮ್ಮ ವೃತ್ತಿಜೀವನದ ಚೊಚ್ಚಲ ಸೂಪರ್ 750 ಪ್ರಶಸ್ತಿಯನ್ನು ವಶಪಡಿಸಿಕೊಳ್ಳುವುದರ ಜೊತೆಗೆ ಜಪಾನ್ ಓಪನ್ ಇತಿಹಾಸದಲ್ಲೇ ಪ್ರಶಸ್ತಿ ಗೆದ್ದ ಮೊದಲ ಭಾರತೀಯ ಆಟಗಾರ್ತಿ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.

------------------------------------

ಕಾಮನ್‌ವೆಲ್ತ್ ಕ್ರೀಡಾಕೂಟ 2026, ಭಾರತೀಯ ತಂಡವನ್ನು ಮುನ್ನಡೆಸಲಿರುವ ಒಲಿಂಪಿಕ್ ನಾಯಕಿಯರು

ಸ್ಕಾಟ್‌ಲ್ಯಾಂಡ್‌ನ ಗ್ಲ್ಯಾಸ್ಗೋ ನಗರದಲ್ಲಿ ಜುಲೈ 23ರಿಂದ ಆರಂಭವಾಗಲಿರುವ 2026ರ ಪ್ರತಿಷ್ಠಿತ ಕಾಮನ್‌ವೆಲ್ತ್ ಕ್ರೀಡಾಕೂಟದ ವರ್ಣರಂಜಿತ ಉದ್ಘಾಟನಾ ಸಮಾರಂಭದಲ್ಲಿ ಒಲಿಂಪಿಕ್ ಪದಕ ವಿಜೇತ ವೇಟ್‌ಲಿಫ್ಟರ್ ಸೈಖೋಮ್ ಮೀರಾಬಾಯಿ ಚಾನು ಭಾರತದ ತ್ರಿವರ್ಣ ಧ್ವಜ ಹಾಗೂ ಬಾಕ್ಸಿಂಗ್ ತಾರೆ ಲವಿನಾ ಬೋರ್ಗೊಹೇನ್ ‘ಕಿಂಗ್ಸ್ ಬ್ಯಾಟನ್’ ಹಿಡಿಯುವ ಮೂಲಕ ದೇಶದ 124 ಕ್ರೀಡಾಪಟುಗಳ ಬೃಹತ್ ತಂಡಕ್ಕೆ ಧ್ವಜಧಾರಿಗಳಾಗಿ ನಾಯಕತ್ವ ವಹಿಸಿ ಯಶಸ್ವಿಯಾಗಿ ಮುನ್ನಡೆಸಲಿದ್ದು, ಅಂತರರಾಷ್ಟ್ರೀಯ ಮಟ್ಟದಲ್ಲಿ ಭಾರತಕ್ಕೆ ಹೆಮ್ಮೆ ತಂದಿರುವ ಈ ಇಬ್ಬರು ಕ್ರೀಡಾಪಟುಗಳ ಸಾಧನೆಯನ್ನು ಶ್ಲಾಘಿಸಿ ಭಾರತೀಯ ಒಲಿಂಪಿಕ್ ಸಂಸ್ಥೆಯ (IOA) ಅಧ್ಯಕ್ಷರಾದ ಪಿ.ಟಿ. ಉಷಾ ಅವರು ಕ್ರೀಡಾಪಟುಗಳಿಗೆ ಹೃತ್ಪೂರ್ವಕ ಶುಭ ಹಾರೈಸಿದ್ದಾರೆ.

________________________________________________________________________________

17 & 18 Current Affairs ಪ್ರಚಲಿತ ವಿದ್ಯಮಾನಗಳು

 

ರಾಜ್ಯ ಸುದ್ದಿಗಳು :

'ಕರ್ನಾಟಕ ಅಪಾರ್ಟ್‌ಮೆಂಟ್‌ ಕರಡು ಮಸೂದೆ 2025'

ಕರ್ನಾಟಕ ಸರ್ಕಾರವು ಬೆಂಗಳೂರು ಸೇರಿದಂತೆ ರಾಜ್ಯದ ಲಕ್ಷಾಂತರ ಅಪಾರ್ಟ್‌ಮೆಂಟ್ ನಿವಾಸಿಗಳ ಹಿತ ಕಾಯಲು, ಜಂಟಿ ಜಾಗದ ಮಾಲೀಕತ್ವದ ಗೊಂದಲ ನಿವಾರಣೆ, ವಂಚನೆ ತಡೆ ಹಾಗೂ ಹಳೆಯ ಕಟ್ಟಡಗಳ ಸುಲಭ ಪುನರಾಭಿವೃದ್ಧಿಗಾಗಿ ರೇರಾ ನಿಯಮಗಳಿಗೆ ಹೊಂದಿಕೆಯಾಗುವಂತೆ 53 ವರ್ಷ ಹಳೆಯ ಕಾಯ್ದೆಗಳನ್ನು ಬದಲಾಯಿಸಿ ನೂತನ 'ಕರ್ನಾಟಕ ಅಪಾರ್ಟ್‌ಮೆಂಟ್ (ಮಾಲೀಕತ್ವ ಮತ್ತು ನಿರ್ವಹಣೆ) ಕರಡು ಮಸೂದೆ, 2025' ಅನ್ನು ಸಾರ್ವಜನಿಕರ ಸಲಹೆಗಾಗಿ ಬಿಡುಗಡೆ ಮಾಡಿದೆ.

53 ವರ್ಷಗಳಷ್ಟು ಹಳೆಯದಾದ ಈ ಕೆಳಗಿನ ಎರಡು ಪ್ರಮುಖ ಕಾಯ್ದೆಗಳ ಬದಲಾಗಿ ತರಲಾಗುತ್ತಿದೆ:

 1. ಕರ್ನಾಟಕ ಅಪಾರ್ಟ್‌ಮೆಂಟ್ ಮಾಲೀಕತ್ವ ಕಾಯ್ದೆ, 1972

 2. ಕರ್ನಾಟಕ ಮಾಲೀಕತ್ವದ ಫ್ಲ್ಯಾಟ್‌ಗಳ ಕಾಯ್ದೆ, 1972

------------------------------

ರಾಜ್ಯದ ಕ್ರೀಡಾಂಗಣಗಳ ಪ್ರಗತಿ ಹಾಗೂ ಕ್ರೀಡಾಪಟುಗಳ ಉದ್ಯೋಗಾವಕಾಶಕ್ಕೆ ನೂತನ ಚಾಲನೆ

ಕರ್ನಾಟಕ ಸರ್ಕಾರವು ಕ್ರೀಡಾ ಕ್ಷೇತ್ರದ ಸರ್ವತೋಮುಖ ಪ್ರಗತಿಗಾಗಿ ₹36 ಕೋಟಿ ವೆಚ್ಚದಲ್ಲಿ ರಾಜ್ಯದ 32 ಪ್ರಮುಖ ಕ್ರೀಡಾಂಗಣಗಳನ್ನು ಸುಧಾರಿಸಲು ಮುಂದಾಗಿದ್ದು, ಅಂತಾರಾಷ್ಟ್ರೀಯ ಕ್ರೀಡಾಕೂಟಗಳಲ್ಲಿ ಸಾಧನೆಗೈದ ಸಾಧಕರಿಗೆ ಸರ್ಕಾರಿ ಸೇವೆಗಳಲ್ಲಿ ನೇರ ನೇಮಕಾತಿಯಡಿ ಉದ್ಯೋಗ ಆದೇಶ ನೀಡುವ ಮೂಲಕ ಮತ್ತು ಬಾಕಿ ಇರುವ ಸುಮಾರು 72 ಸಾವಿರ ಹುದ್ದೆಗಳಲ್ಲಿ ಕ್ರೀಡಾಪಟುಗಳಿಗೆ ಶೇ. 2ರಷ್ಟು ಮೀಸಲಾತಿ ಕಲ್ಪಿಸಲು ಅಗತ್ಯ ಕ್ರಮಗಳನ್ನು ಕೈಗೊಳ್ಳುತ್ತಿದೆ.

------------------------------------------------------------------------------------------------------

ರಾಷ್ಟ್ರೀಯ ಸುದ್ದಿಗಳು :

'ಎನ್‌ಪಿಎಸ್ ಸಂಚಯ್' ಯೋಜನೆ ಅಸಂಘಟಿತ ವಲಯಕ್ಕೆ ಹೊಸ ಆಶಾಕಿರಣ: 

ದೇಶದ ಶೇಕಡಾ 90 ರಷ್ಟಿರುವ ರೈತರು, ಬೀದಿಬದಿ ವ್ಯಾಪಾರಿಗಳು ಮತ್ತು ದಿನಗೂಲಿ ನೌಕರರಂತಹ ಅಸಂಘಟಿತ ವಲಯದ ಕಾರ್ಮಿಕರಿಗೆ ನಿವೃತ್ತಿಯ ನಂತರ ಆರ್ಥಿಕ ಭದ್ರತೆ ಒದಗಿಸಲು, ಪಿಂಚಣಿ ನಿಧಿ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರವು (PFRDA) ಯಾವುದೇ ಗೊಂದಲವಿಲ್ಲದ 'ಡಿಫಾಲ್ಟ್ ಡಿಸೈನ್' ಹೊಂದಿರುವ ಸರಳೀಕೃತ 'ಎನ್‌ಪಿಎಸ್ ಸಂಚಯ್' ಪಿಂಚಣಿ ಯೋಜನೆಯನ್ನು ಜಾರಿಗೆ ತಂದಿದೆ.

----------------------------------

SBI ನ ನೂತನ  CFO (Chief Financial Officer) ಆಗಿ 'ಸುನಿಲ್ ಅಗರ್ವಾಲ್' ರವರು ಆಯ್ಕೆ 

ಕಾಮೇಶ್ವರ್ ರಾವ್ ಕೊಡವಂತಿ ಅವರ ಅವಧಿ ಮುಕ್ತಾಯಗೊಂಡ ಹಿನ್ನೆಲೆಯಲ್ಲಿ, ದೇಶದ ಅತಿ ದೊಡ್ಡ ಸಾರ್ವಜನಿಕ ವಲಯದ ಬ್ಯಾಂಕ್ ಆದ ಎಸ್‌ಬಿಐ ತನ್ನ ನೂತನ ಮುಖ್ಯ ಹಣಕಾಸು ಅಧಿಕಾರಿಯಾಗಿ (CFO) ಹಣಕಾಸು ಮತ್ತು ತಂತ್ರಜ್ಞಾನ ಕ್ಷೇತ್ರದಲ್ಲಿ 27 ವರ್ಷಗಳಿಗೂ ಅಧಿಕ ಅನುಭವ ಹೊಂದಿರುವ ಹಾಗೂ ಎಲ್‌ಐಸಿಯ ಮಾಜಿ ಸಿಎಫ್‌ಒ ಆಗಿದ್ದ ಚಾರ್ಟರ್ಡ್ ಅಕೌಂಟೆಂಟ್ ಮತ್ತು ಕಂಪ್ಯೂಟರ್ ಸೈನ್ಸ್ ಎಂಜಿನಿಯರ್ ಸುನಿಲ್ ಅಗರ್ವಾಲ್ ಅವರನ್ನು ನೇಮಕ ಮಾಡಿದ್ದು, ಇವರು ಆಗಸ್ಟ್ 1, 2026 ರಿಂದ ಅಧಿಕೃತವಾಗಿ ಪೂರ್ಣ ಪ್ರಮಾಣದ ಅಧಿಕಾರ ವಹಿಸಿಕೊಳ್ಳಲಿದ್ದಾರೆ.

-----------------------------------

ಫ್ಯಾಟಿ ಲಿವರ್ ಚಿಕಿತ್ಸೆಗೆ 'ವೆಗೋವಿ' ಇಂಜೆಕ್ಷನ್‌ಗೆ CDSCO ಗ್ರೀನ್ ಸಿಗ್ನಲ್

ಭಾರತದ ಔಷಧ ನಿಯಂತ್ರಣ ಸಂಸ್ಥೆಯಾದ CDSCO, ಜಾಗತಿಕವಾಗಿ ತೂಕ ಇಳಿಕೆಗೆ ಹೆಸರಾಗಿರುವ ನೋವೋ ನಾರ್ಡಿಸ್ಕ್ ಸಂಸ್ಥೆಯ 'ವೆಗೋವಿ' (ಸೆಮಾಗ್ಲುಟೈಡ್ 2.4 mg) ಇಂಜೆಕ್ಷನ್ ಅನ್ನು ದೇಶದಲ್ಲಿ 'ಮ್ಯಾಶ್' (MASH - ಫ್ಯಾಟಿ ಲಿವರ್) ಕಾಯಿಲೆಯ ಚಿಕಿತ್ಸೆಗಾಗಿ ಬಳಸಲು ಅಧಿಕೃತವಾಗಿ ಅನುಮೋದಿಸಿದೆ; ಇದು ಭಾರತೀಯ ಮಾರುಕಟ್ಟೆಯಲ್ಲಿ ಈ ಕಾಯಿಲೆಗೆ ಲಭ್ಯವಾಗಲಿರುವ ಮೊದಲ GLP-1 ರಿಸೆಪ್ಟರ್ ಅಗೋನಿಸ್ಟ್ ಔಷಧವಾಗಿದೆ.

-----------------------------------------------

ಅಮೃತ್ ಭಾರತ್ ನಿಲ್ದಾಣಗಳು ಮತ್ತು ಹೈಡ್ರೋಜನ್ ರೈಲು

ಪ್ರಧಾನಿ ನರೇಂದ್ರ ಮೋದಿಯವರು ಜುಲೈ 17, 2026 ರಂದು 'ವಿರಾಸತ್ ಭಿ, ವಿಕಾಸ್ ಭಿ' ಧ್ಯೇಯವಾಕ್ಯದೊಂದಿಗೆ ₹1,570 ಕೋಟಿ ವೆಚ್ಚದಲ್ಲಿ 20 ರಾಜ್ಯಗಳ 75 ಆಧುನೀಕರಿಸಿದ ರೈಲ್ವೆ ನಿಲ್ದಾಣಗಳನ್ನು 'ಅಮೃತ್ ಭಾರತ್ ಸ್ಟೇಷನ್ ಯೋಜನೆ' ಅಡಿಯಲ್ಲಿ ರಾಷ್ಟ್ರಕ್ಕೆ ಸಮರ್ಪಿಸಿದ್ದಲ್ಲದೆ, ಸಾರಿಗೆ ವಲಯದಲ್ಲೇ ಕ್ರಾಂತಿಕಾರಕ ಬದಲಾವಣೆ ತರಬಲ್ಲ ದೇಶದ ಮೊಟ್ಟಮೊದಲ ಪರಿಸರಸ್ನೇಹಿ 'ಹೈಡ್ರೋಜನ್ ಚಾಲಿತ ರೈಲಿಗೆ' ಚಾಲನೆ ನೀಡುವ ಮೂಲಕ ಭಾರತೀಯ ರೈಲ್ವೆ ಇತಿಹಾಸದಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದ್ದಾರೆ.

 10 ಬೋಗಿಗಳ ವಿಶ್ವದ ಅತಿ ಉದ್ದದ ಹೈಡ್ರೋಜನ್ ರೈಲನ್ನು ಚಾಲನೆಗೊಳಿಸಿ ಇತಿಹಾಸ ನಿರ್ಮಿಸಿದೆ. 3,200 HP ಸಾಮರ್ಥ್ಯದ ಈ ಪರಿಸರಸ್ನೇಹಿ, ಸ್ವದೇಶಿ ರೈಲು ಹರಿಯಾಣದ ಜಿಂದ್ ಮತ್ತು ಸೋನಿಪತ್ ನಡುವೆ ಸಂಚರಿಸುತ್ತದೆ.

------------------------------------------------------------------------------------------------------

ಅಂತಾರಾಷ್ಟ್ರೀಯ ಸುದ್ದಿಗಳು :

ಯುಎನ್‌ಎಎಂಎ (UNAMA) ನೂತನ ಮುಖ್ಯಸ್ಥರಾಗಿ ರಬಾಬ್ ಫಾತಿಮಾ ನೇಮಕ 

(United Nations Assistance Mission in Afghanistan)

ಅಫ್ಘಾನಿಸ್ತಾನದಲ್ಲಿ ಶಾಂತಿ ಮತ್ತು ಪ್ರಗತಿಯನ್ನು ಸ್ಥಾಪಿಸುವ ನಿಟ್ಟಿನಲ್ಲಿ ವಿಶ್ವಸಂಸ್ಥೆಯ ಮಹಾಪ್ರಧಾನ ಕಾರ್ಯದರ್ಶಿ ಆಂಟೋನಿಯೊ ಗುಟೆರಸ್ ಅವರು ಕಿರ್ಗಿಸ್ತಾನದ ರೋಜಾ ಒತುನ್‌ಬಾಯವಾ ಅವರ ಅಧಿಕಾರಾವಧಿ ಮುಕ್ತಾಯದ ನಂತರ, ಅವರ ಉತ್ತರಾಧಿಕಾರಿಯಾಗಿ 30 ವರ್ಷಗಳಿಗಿಂತಲೂ ಹೆಚ್ಚು ಜಾಗತಿಕ ರಾಜತಾಂತ್ರಿಕ ಅನುಭವ ಹೊಂದಿರುವ ಬಾಂಗ್ಲಾದೇಶದ ರಬಾಬ್ ಫಾತಿಮಾ ಅವರನ್ನು ವಿಶ್ವಸಂಸ್ಥೆಯ ಅಫ್ಘಾನಿಸ್ತಾನ ನೆರವು ಮಿಷನ್‌ನ ನೂತನ ವಿಶೇಷ ಪ್ರತಿನಿಧಿ ಹಾಗೂ ಮುಖ್ಯಸ್ಥರನ್ನಾಗಿ ಅಧಿಕೃತವಾಗಿ ನೇಮಕ ಮಾಡಿದ್ದಾರೆ.

------------------------------------

ಫಿಫಾ ವಿಶ್ವಕಪ್ 2026 ಫೈನಲ್‌ಗೆ ಲಗ್ಗೆ ಇಟ್ಟ ತಂಡಗಳು 

ಅರ್ಜೆಂಟೀನಾ vs ಸ್ಪೇನ್

2026ರ ಫಿಫಾ ವಿಶ್ವಕಪ್‌ನ ರೋಚಕ ಸೆಮಿಫೈನಲ್ ಪಂದ್ಯದಲ್ಲಿ ಲಿಯೋನೆಲ್ ಮೆಸ್ಸಿ ನಾಯಕತ್ವದ ಹಾಲಿ ಚಾಂಪಿಯನ್ ಅರ್ಜೆಂಟೀನಾ ತಂಡವು, ಇಂಗ್ಲೆಂಡ್ ವಿರುದ್ಧ 2-1 ಗೋಲುಗಳ ಅದ್ಭುತ ಜಯ ಸಾಧಿಸುವ ಮೂಲಕ ಸತತ ಎರಡನೇ ಬಾರಿಗೆ ಫೈನಲ್ ಪ್ರವೇಶಿಸಿದ್ದು, ಪ್ರಶಸ್ತಿಗಾಗಿ ಬಲಿಷ್ಠ ಸ್ಪೇನ್ ತಂಡವನ್ನು ಎದುರಿಸಲು ಸಜ್ಜಾಗಿದೆ.

ಅರ್ಜೆಂಟೀನಾ ತಂಡದ ನಾಯಕ - ಲಿಯೋನೆಲ್ ಮೆಸ್ಸಿ (Lionel Messi)

ಸ್ಪೇನ್ ತಂಡದ ನಾಯಕ - ರೊಡ್ರಿ (Rodri)

​"ಜುಲೈ 19, 2026 ರಂದು  ಫಿಫಾ ವಿಶ್ವಕಪ್‌ನ ರೋಚಕ ಫೈನಲ್ ಪಂದ್ಯವು ಯುಎಸ್‌ಎ (USA) ನ ನ್ಯೂಜೆರ್ಸಿಯಲ್ಲಿರುವ ಪ್ರಸಿದ್ಧ 'ನ್ಯೂಯಾರ್ಕ್ ನ್ಯೂಜೆರ್ಸಿ ಸ್ಟೇಡಿಯಂ' (ಮೆಟ್‌ಲೈಫ್ ಸ್ಟೇಡಿಯಂ) ನಲ್ಲಿ ನಡೆಯಲಿದೆ."

 

------------------------------------------------------------------------------------------------------

https://link.amazon/B0edI3wDc